Almatyda EAEO elderiniń Úkimet basshylary tsıfrlandyrý máselelerin talqylaıdy
Forýmǵa EAEO-ǵa múshe memleketteriniń Úkimet basshylary, aqparattyq tehnologııalar salasyndaǵy halyqaralyq sarapshylar, halyqaralyq uıymdardyń ókilderi, saıasatkerler, ǵalymdar, bıznesmender qatysyp, Eýrazııanyń birtutas ınnovatsııalyq ekojúıesin qurý jáne damytýǵa arnalǵan ortaq alańynda odaqqa múshe elderdiń tehnologııalyq áleýetin ashý máselelerin talqylaıdy.
Bıylǵy forýmnyń spıkerleri eń iri IT-kompanııalardyń quryltaıshylary, halyqaralyq aqparattyq tehnologııalyq parkterdiń basshylary men AQSh, Ulybrıtanııa, Germanııa, Frantsııa, Sıngapýr, Shveıtsarııa jáne TMD elderiniń tehnologııalyq ındýstrııa salasyndaǵy 50-den astam ókilderi qatysady.
«Jahandaný dáýirindegi tsıfrlyq kún tártibi 2.0.» forýmy aıasynda Reseı, Qazaqstan, Belarýs, Qyrǵyzstan premer-mınıstrleri men Armenııa vıtse-premeri jáne halyqaralyq sarapshylardyń qatysýymen plenarlyq sessııasy ótedi. Qatysýshylar Eýrazııa tehnoparkteriniń ıntegratsııalaý perspektıvalaryn talqylap, birlesken ınnovatsııalyq jobalardy qurý, IT salasyndaǵy jas mamandar men startap-kompanııalardy qoldaý jáne olardy ilgeriletý máseleleri boıynsha tájirıbesimen almasady.
Sonymen qatar, Forým baǵdarlamasynda bes paneldik sessııa EAEO tsıfrlyq kún tártibi, ınnovatsııalyq ekojúıe, Indýstrııa 4.0, (BUU ókilderiniń qatysýymen) turaqty damýǵa qol jetkizý jáne shaǵyn orta bıznesti tsıfrlandyrýǵa arnalady.
2017 jyldyń 11 qazanynda Joǵary Eýrazııalyq ekonomıkalyq keńestiń otyrysynda jarııalanǵandaı, «Jahandaný dáýirindegi tsıfrlyq kún tártibi» jyl saıynǵy forýmy Memleket basshysy Nursultan Nazarbaevtyń bastamasymen ótkizildi. Forýmnyń basty maqsaty - EAEO elderiniń tsıfrlyq ekonomıkalaryn damytýdy jedeldetý jáne olardyń básekege qabilettiligin arttyratyn birlesken sharalardy ázirleý.
