Almatyda dzıýdodan álem chempıonaty ótedi
ALMATY. QazAqparat - 25-29 qyrkúıek kúnderi Almaty qalasynda dzıýdodan jasóspirimder (kadet) arasynda dzıýdodan Álem chempıonaty ótedi, dep habarlaıdy QazAqparat tilshisi Qazaqstan dzıýdo federatsııasyna silteme jasap.
Halyqaralyq dzıýdo federatsııasynyń kúntizbesine sáıkes ótetin Álem birinshiliginde 17 jasqa deıingi jasóspirimder 16 salmaq dárejesinde baq synaıdy.
«Osyndaı mańyzdy jarysty Qazaqstanda ótkizýge senip tapsyrǵandary úshin Halyqaralyq dzıýdo federatsııasyna alǵys aıtamyz. Ózderińiz biletindeı, Qazaqstan dzıýdodan álemdik arenada ózindik orny bar bedeldi el bolyp sanalady. Osyǵan deıin eresekter arasynda Gran Prı, «Masters», sondaı-aq, Álem chempıonaty syndy iri jarystardy abyroımen ótkizdi. 2019 jyl Memleket basshysynyń usynysymen «Jastar jyly» bolyp jarııalanǵanyn bilesizder. Elbasymyz aıtpaqshy, bizdiń bolashaǵymyz - jastar, jasóspirim býyn bolǵandyqtan, jasóspirimder arasyndaǵy Álem chempıonatynyń róli biz úshin - mańyzdy. Bul bizdiń kishkentaı sportshylarymyzdyń sheberlikterin shyńdap, elimizde balalar arasynda dzıýdonyń damýyna zor úles qosady. Sonymen qatar, bolashaqta el namysyn abroımen qorǵaıtyn sportshylardy daıyndaýda kómegin tıgizedi dep oılaımyn», - deıdi Qazaqstan dzıýdo federatsııasynyń bas hatshysy Ashat Jıtkeev.
Aıta keterligi, dzıýdodan jasóspirimder arasyndaǵy Álem chempıonatyn ótkizýge Almatymen (Qazaqstan) qatar, Ulanbatyr (Mońǵolııa) men Ábý-Dabı (BAÁ) qalalary úmitker bolǵan.
Avtor: Elaman Turysbekov
