Almatyda dzıýdodan Álem birinshiliginiń jeńimpazdary marapattaldy
ALMATY. QazAqparat - Búgin Almatyda Qazaqstannyń dzıýdo federatsııasy taıaýda Astanada dzıýdo kúresinen ótken Álem birinshiliginiń jeńimpazdaryn marapattady.
Óziniń alǵy sózinde federatsııa prezıdenti Keńes Raqyshev Álem birinshiliginiń joǵary deńgeıde ótkizilgendigin aıtty. «Biz bergen ýádelerimizdiń barlyǵyn oryndap kelemiz. Kezinde, Astanada dzıýdo kúresinen Álem birinshiligin ótkizsek dep tilek bildirip edik. Minekı, ony da joǵary deńgeıde ótkizdik. Men sportshylarymyzdy, olardyń jattyqtyrýshylaryn, barlyq komandalardy, sondaı-aq osy sharany ótkizýge atsalysqan barsha jandardy quttyqtap, alǵysymdy bildiremin», - dedi K. Raqyshev. Osydan keıin, ol marapattaý rásimine kiristi. Dzıýdodan 60 keli salmaq dárejesinde 2015 jylǵy Álem chempıony Eldos Smetovke arnaıy dıplom jáne 15 000 000 teńge kóleminde aqshalaı syılyq tabys etildi. Al sol Álem birinshiliginde 60 keli salmaq dárejesinde kúmis medalge qol jetkizgen Rústem Ybraev arnaıy dıplommen jáne 10 000 000 teńge kóleminde aqshalaı syılyqpen marapattaldy. Sonymen qatar, dzıýdodan Qazaqstan ulttyq quramasynyń bas bapkeri Ermek Imambekov, Eldos Smetov pen Rústem Ybraevtyń jattyqtyrýshylary Ǵalymjan Jylgeldıev pen Altynbek Jıembaev, Bosnııada Kadetter arasynda ótken Álem chempıonatynyń chempıony Aıbolat Ystybaıǵa, 1 000 000 teńge kóleminde syıaqylar tabys etildi. Budan basqa, dzıýdo kúresinen ulttyq qurama komandanyń jattyqtyrýshylary, dárigeri men massaj jasaýshylary da aqshalaı syılyqqa ıe boldy. Óziniń qorytyndy sózinde Keńes Hamıtuly bul tek dzıýdo federatsııasy atynan kórsetilip jatqan qurmet ekendigin, taıaý ýaqytta Tımýr Qulybaev basqaratyn Sporttyq jekpe-jek jáne kúsh qoldanylatyn sport túrleri Konfederatsııasy tarapynan da marapattaý rásimi bolatyndyǵyn basa aıtty. Aıta ketelik, 2015 jyldyń 24 - 30 tamyzy aralyǵynda Astana qalasynda dzıýdo kúresinen álem birinshiligi ótkizilgen bolatyn. Oǵan 120 memleketten kelgen 700-den astam sportshy qatysty. Medal qory boıynsha elimizdiń ulttyq quramasy tórtinshi orynǵa ıe boldy. Qazaqstannyń dzıýdo tarıhynda mundaı jetistik bolǵan emes. Bizdiń aldymyzda Japonııa, Frantsııa jáne Ońtústik Koreıa elderi ornalasty. Al, erler arasynda qazaq quramasy Frantsııamen birge úshinshi oryn aldy, birinshi jáne ekinshi orynda Japonııa men Ońtústik Koreıa. Altyn medal Eldos Smetovtyń (60 keli) enshisinde, al kúmisti Rústem Ybraev (60 keli) oljalady.
