Almatyda Dzıýdo akademııasy ashylady
ASTANA. QazAqparat - 13 mamyrda Almaty qalasynda dzıýdo akademııasynyń saltanatty túrde ashylý rásimi ótedi, dep habarlady QR Dzıýdo federatsııasynyń baspasóz qyzmetinen.
Jańa akademııa barlyq halyqaralyq talaptarǵa saı bolmaq. Sport kesheninde 4 tatamıge arnalǵan zal, trenajer zaly, 100 adamǵa arnalǵan jataqhana men ashana ornalasady. Onyń ishinde Qazaqstan ulttyq quramasynyń ǵana sportshylary emes, dzıýdo kúresine endi qyzyǵýshylyq tanytqan jetkinshekter de jattyǵa alady. Sonymen qatar, akademııa aıasynda halyqaralyq dárejede oqý-jattyǵýlar, sheteldik mamandardyń qatysýymen semınarlar men sheberlik sabaqtaryn uıymdastyrý kózdelgen.
Esterińizge salaıyq, qurylystyń alǵashqy tasyn qalaýǵa Halyqaralyq dzıýdo federatsııasynyń prezıdenti Marıýs Vızer men Qazaqstan dzıýdo federatsııasynyń prezıdenti Keńes Raqyshev qatysqan edi.
Al akademııanyń saltanatty túrde ashylý rásimine QR Mádenıet jáne sport mınıstri Arystanbek Muhamedıuly, Almaty qalasynyń ákimi Baýyrjan Baıbek, Halyqaralyq dzıýdo federatsııasynyń prezıdenti Marıýs Vızer men Qazaqstan dzıýdo federatsııasynyń prezıdenti Keńes Raqyshevtiń qatysýy josparlanǵan.
