Almatyda djıý-djıtsýdan úzdik sportshylar anyqtaldy
ALMATY. QazAqparat - Almatyda qyzdar men erler arasynda brazılııalyq djıý-djıtsýdan «Arlan Grip Championship «Koktem Open - 2019» xalyqaralyq týrnıri ótti. Bul týraly Almaty qazaqstandyq aqparat ortalyǵynan málim etti, dep habarlaıdy QazAqparat.
Qazaqstan, Ózbekstan, Qyrǵyzstan elderinen kelgen 1 myńǵa jýyq sportshy eki kún boıy ár salmaq sanatynda ári jas aıyrmashylyqtary boıynsha ózara myqtyny anyqtady. Jarystyń alǵashqy kúninde 4-17 jastaǵy, al ekinshi kúnde 18-den joǵary jastaǵy sportshylar óner kórsetti.
«Bul reıtıngti týrnır jaqyn ári alys shet elden kelgen qatysýshylarǵa jaqsy tanys. Keshe balalar arasynda 640 adam jınap rekord ornattyq. Al búgingi eresekter arasyndaǵy jarysqa 250-den astam sportshy qatysty. Osyndaı kórsetkish bizdi óte qýantady», - deıdi Qazaqstandyq brazılııalyq djıý-djıtsý jáne grepplıng federatsııasynyń halyqaralyq qatynastar jónindegi vıtse-prezıdenti Aqmaral Qanatbaeva.
Onyń aıtýynsha, qazirgi tańda bul jarystyń qatysýshylary aldaǵy ýaqytta ótetin halyqaralyq jarystarǵa daıyndalyp jatyr.
«Qazir Qazaqstan quramasy Abý-Dabı qalasynda brazılııalyq djıý-djıtsýdan ótetin Álem chempıonatyna daıyndalýda. Jarys sáýirdiń 21-26 aralyǵyna josparlanǵan. Olar keıin, mamyrdyń 10-14 kúnderi áýesqoılar arasyndaǵy grepplıngten (AIGA) ótetin týrnırge Japonııaǵa attanady», - dedi Aqmaral Qanatbaeva.
Eki kúnge jalǵasqan bul týrnır kez kelgen qatysýshylar arasynda ABB Arena-da IBJJF halyqaralyq federatsııa erejesine sáıkes ótkizildi. Onyń basty maqsaty - elimizde djıý-djıtsýdy damytyp, elge tanytý, sport pen salaýatty ómir saltyn nasıhattaý.
Jeńimpazdar men júldegerlerge medaldar men dıplomdar tabystaldy. Jarystyń nátıjelerin smoothcomp.com saıtynan kórýge bolady.
Aıta keter jaıt, Ábý-Dabıdegi Álem chempıonaty jyl saıyn balalar jáne eresekter arasynda ótkiziledi.
