Almatyda djıý-djıtsýdan QTT Kids ashyq týrnıri ótti
ASTANA. QazAqparat - Almatyda Kazakhstan Top Team klýbynyń Qajymuqan Munaıtpasov atyndaǵy akademııasynda brazılııalyq djıý-djıtsýdan 4-15 jasqa deıingi balalar men jasóspirimder arasynda QTT Kids ashyq týrnıri ótti, dep xabarlaıdy aqparattyq jáne sporttyq HAB.
Bul jarysta IBJJF erejelerine sáıkes túrli salmaq dárejeleri boıynsha Qazaqstannyń ár aımaǵynan kelgen 270-ten asa qyzdar men uldar ózara myqtyny anyqtady. Jarys qorytyndysy boıynsha, jeńimpazdar men júldegerler dıplom jáne medaldarmen marapattaldy.
«Maǵan búgingi jarys qatty unady. Birinshi oryn alǵanyma óte qýanyshtymyn. Ózimniń bapkerlerim Nursultan aǵa men Samat aǵa maǵan jaqsy qoldaý kórsetti. Sol kisilerge alǵys aıtamyn. Men ózim osy sportpen aınalysyp kele jatqanyma 5 jyl boldy. Qazir Almaty oblysyndaǵy Saǵadat batyr klýbynda daıyndalamyn. Alda áli jeńister bolady degen senimdemin», - dep jeńimpazdardyń biri Samat Janalı óz oıymen bólisti.
Aıta keter jaıt, bul týrnırdiń basty maqsaty, Qazaqstandaǵy djıý-djıtsýdy damytyp, elge tanytý, sport pen salaýatty ómir saltyn nasıhattaý jáne sportshylardyń sheberlikterin arttyryp, úzdikterdi anyqtaý bolyp tabylady.
