Almatyda Dúnıejúzilik Kontratseptsııa kúnine arnalǵan konferentsııa ótti
ALMATY. Qazannyń 20-y. QazAqparat /Názıra Eleýhan/ - Almatyda Halyqaralyq Bıznes ýnıversıtetinde (UIB) "Túsiktiń qaýipti ekenin eskertý jáne reprodýktıvti jastaǵy qyzdardyń densaýlyǵyn qorǵaý" degen taqyrypta stýdenttik konferentsııa bolyp ótti.
Atalmysh shara Jahandyq halyqaralyq "Dúnıejúzilik Kontratseptsııa kúni" aıasynda jáne bala boldyrmaıtyn dárilerdiń oılap tabylǵandyǵynyń 50 jyldyǵyna oraı ótkizildi.
Konferentsııa barysynda jastar túsiktiń sońy nege ákeletindigi jaıynda túsirilgen fılmdi kórip, medıtsına sarapshylarynyń otbasyn josparlaý, bala týý qabiletin saqtaý, kontratseptsııa týraly kásibı keńesterin tyńdady. Sonymen qatar, stýdent jastar atalmysh másele boıynsha óz baıandamalaryn oqyp, mamandarmen pikir almasty.
"Qazaqstan 2007 jyldan beri halyqaralyq aqparattyq-aǵartý naýqanyna tartyldy. Ondaǵy maqsat - turǵyndarǵa otbasyn qurýdy josparlaý, túsiktiń aldyn alý tásili retinde kontratseptsııalyq dárilerdi nasıhattaý, áıelderdiń reprodýktıvti densaýlyǵyn saqtaý syndy máseleler boıynsha aqparattandyrý bolyp tabylady. Bul sharalardy búginde halyqaralyq úkimettik emes uıymdary (MSI, ESC, CELSAM, APCOC) iske asyrýda. Bizdiń elimizde bul bastamaǵa álemdik kóshbasshysy bolyp tabylatyn gormonaldy dárilerdi shyǵarýshy «Baıer Sherıng Farma» kompanııasy qoldaý bildirip keledi. Biz de óz tarapymyzdan jastar arasynda bul máseleni kótere otyryp, ol jaıynda búgingi jastar tolyq aqparattandyrylýy tıis dep sanaımyz. Ár bir jas sanaly túrde ata-ana bolýynyń qanshalyqty mańyzdy ekenin bilýi qajet", - dedi jobanyń jetekshisi Denıs Lazarev.
DDU-nyń málimetteri boıynsha, búkil álemde 80 mıllıon áıel josparlanbaǵan júktilik problemasyna ushyrasa, 20 mıllıon áıel túsik jasatady, onyń nátıjesinde 68 000 áıel kóz jumady. Bul máselege damyǵan elder de, damýshy elder de ushyrasýda.
Dúnıejúzilik kontratseptsııa kúni - 2007 jyly qyrkúıektiń 26-da reprodýktıvti densaýlyq saýalymen shuǵyldanatyn kóptegen uıymdardyń bastamasymen alǵashqy ret belgilendi. Onyń maqsaty - álem boıynsha áıelderdiń densaýlyǵyn saqtaýda kontratseptsııany nasıhattaý, jastarǵa tanystyryp, aqparat berý, kontratseptsııa men otbasyn josparlaý tásilderin tańdaýǵa keńes berý.
