Almatyda Dúnıejúzilik densaýlyq saqtaý uıymynyń keńsesin ashýǵa baǵyttalǵan kelisim qabyldandy - Senat

ASTANA. QazAqparat - Búgin Parlament Senaty «Qazaqstan Respýblıkasynyń Úkimeti men Dúnıejúzilik densaýlyq saqtaý uıymy arasyndaǵy Qazaqstan Respýblıkasynyń Almaty qalasynda Dúnıejúzilik densaýlyq saqtaý uıymynyń (DDU) medıtsınalyq-sanıtarııalyq alǵashqy kómek jónindegi geografııalyq jaǵynan qashyq ornalasqan ofısin ashý týraly kelisimdi ratıfıkatsııalaý týraly» QR Zańyn qabyldandy.

Kelisim 2014 jyldyń 21 mamyrda Jenevada jasaldy.

DDU keńsesiniń basty mindetteri medıtsınalyq-sanıtarııalyq alǵashqy kómekti damytý salasynda densaýlyq saqtaý qyzmetterin kórsetýdi kúsheıtý, DDU eýropalyq óńirliń bıýrosynyń densaýlyq saqtaý qyzmetterin ádil, qaıyrymdy, nátıjeli jáne tıimdi usynýǵa qatysty jahandyq mindetterin oryndaýǵa kómektesetin bolady.

Densaýlyq saqtaý jáne áleýmettik damý mınıstri Tamara Dúısenovanyń aıtýynsha, mundaı keńseniń Qazaqstanda ashylýynyń birneshe sebepteri bar. «Birinshiden, 1978 jyly alǵashqy medıtsınalyq-sanıtarııalyq kómekti damytý týraly deklaratsııa Almatyda qabyldanǵan bolatyn. Onyń basty qaǵıdattary dúnıejúzilik densaýlyq saqtaý salasyn damytýda kúni búginge deıin ózekti bolyp tabylady. Ekinshiden, sońǵy on jylda Qazaqstanda densaýlyq saqtaý salasynda reformalar úzdiksiz atqarylyp keledi. Al ofısti qurýdyń basty maqsaty - alǵashqy medıtsınalyq kómekti kúsheıtý. Bul Elbasy aıqyndaǵan «100 naqty qadam» Ult josparyndaǵy alǵashqy medıtsınalyq-sanıtarııalyq kómekti basymdylyqpen qarjylandyrý, aýrýdyń aldyn alý, erte bastan kúresý baǵytyndaǵy ulttyq densaýlyq saqtaý salasyn damytýdyń basty tetiginiń biri», - dedi mınıstr Tamara Dúısenova.

Atalǵan tehnıkalyq ofıs DDU Eýropalyq óńirlik bıýrosynyń densaýlyq saqtaý jáne qoǵamdyq densaýlyqty saqtaý júıeleri bóliminiń jedel bólimshesi retinde jumys isteıtin bolady. Ofıs óz qyzmetin DDU-nyń ekijyldyq josparlaý tsıkline sáıkes júzege asyratyn bolady.