Almatyda Dúnıejúzilik bosqyndar kúnine arnalǵan fotokórme ashyldy

Kórmege álemde ár túrli sebeptermen, bosqyn atanyp, óz elin tastap ketýge májbúr bolǵan jandar týraly túsirilgen 100-den asa jumystar qoıylǵan. Fotosýretterdiń kópshiligi BUU-nyń bosqyndar isi jónindegi Joǵarǵy komıssary Basqarmasynyń 60 jyldyq qyzmeti barysynda jınalǵan sýretter. Uıymdastyrýshylardyń aıtýynsha, kórmeniń maqsaty - bizdiń qoǵamymyzda bosqyndardyń bar ekendigin kórsetý, olarǵa osyndaı sharalar arqyly nazar aýdartý, kóńil bólý.

Kórmeniń ashylý saltanatyna qatysqan qala ákimdiginiń, dıplomatııalyq jáne konsýldyq korpýs, bıznes birlestik, sonymen qatar, halyqaralyq kompanııa ókilderi BUU-nyń bosqyndar isi jónindegi Joǵarǵy komıssary Basqarmasynyń bosqyndar quqyǵan qorǵaýǵa at salyp jatqan isterin atap ótip, mereıtoılarymen quttyqtady.

"Elimizde bosqyn mártebesin alǵandarǵa qoldaý da, kómek te kórsetilip, barlyq jaǵdaılar jasalynýda. Sonymen qatar, quqyqtary da qorǵalýda. Búgingi kúni aramyzda 10-15 jyldan astam ýaqyt turyp jatqan bosqyndar bar. Olar Qazaqstan Respýblıkasynyń ár azamaty sııaqty zańdyq negizde teń quqyly ómir súrýde jáne barlyq quqyn qoldana alýda. Tegin medıtsınalyq kómek pen bilim alýda. Eliniń jaǵdaıy jaqsarǵan kúnde, týǵan jerine qaıtadan qaıtamyz deýshilerge shekteý qoıylmaıdy. Ol ár adamnyń quqyǵy", dedi Kóshi-qon komıteti Almaty qalasy boıynsha departamentiniń dırektory Gúlsara Altynbekova. Onyń aıtýynsha, Qazaqstanda bosqyn mártebesin alǵan 600 bosqynnyń 90 paıyzy Almatyda turady. "Onyń kópshiligi Aýǵanstan, Tájikstan, Ózbekstannan kelgender. Sońǵy ýaqytta qyrǵyz elinen kelip jatqan adamdar kóp, olardyń arasynda ózbekter de, uıǵyr, túrikter de bar. Qazirgi ýaqytta ol elden kelgen 10 otbasy tirkeldi", dedi ol.

Sonymen qatar, Gúlsara Altynbekova 2010 jyly qańtar aıynyń 1-nen kúshine engen bosqyndar týraly jańa zań boıynsha bosqyndarǵa halyqaralyq normalarǵa saı jasalynǵan jańa jol júrý qujattary beriletindigin jetkizdi.