Almatyda dúkenderge urlyqqa túsken sheteldikter ustaldy
ALMATY. QazAqparat – Almatyda Grýzııa men Ázerbaıjan azamattary Almatydaǵy azyq-túlik dúkenderine urlyqqa túsken, dep habarlaıdy QazAqparat tilshisi.
Qylmystyq topta 3 sheteldik bolǵan.
Qalalyq PD krımınaldyq polıtsııa basqarmasynyń málimetinshe, olar tek azyq-túlik dúkenderindegi urlyqpen aınalysqan.
«Qylmystyq top tún ishinde shaǵyn dúkenderdi tonaǵan. Keıbir jaǵdaılarda dabyldy óshirý úshin olar jaryqty aldyn-ala sóndirgen. Kúdiktiler qamaýǵa alyndy. Búgingi tańda olardyń osyǵan uqsas úsh qylmystyq epızodqa qatysy bar ekendigi dáleldendi. Ustalǵandardyń úsheýi – Grýzııa men Ázerbaıjan azamattary ekendigi anyqtaldy, taǵy bireýi – bizdiń jerlesimiz. Jedel-izdestirý sharalary jalǵasyp jatyr», – dedi Almaty qalalyq polıtsııa Departamenti bastyǵynyń orynbasary Berik Ábilbekov.
Bul isti Alataý aýdandyq Polıtsııa basqarmasy aldy. Qazir tergeý júrip jatyr.
