Almatyda dosyn óltirdi dep aıyptalǵan jasóspirim sotta aqtalyp shyqty

ALMATY. QazAqparat – Almaty qalasynyń mamandandyrylǵan aýdanaralyq sotynda dosyn óltirip, aqshasyn urlady dep aıyptalǵan jasóspirimge qatysty qylmystyq is qaraldy, dep habarlaıdy QazAqparat tilshisi.

Almaty qalalyq soty taratqan málimetke sáıkes, kámeletke tolmaǵan sottalýshy R. dosy S-men kezdesip, aralarynda qaryzǵa baılanysty janjal týyndap, sońy tóbeleske ulasqan.

Sottalýshy R. dosy S-ny aıaq kıiminiń baýymen býyndyryp óltirip, onyń bank kartasyn urlap, dúkende 28 myń teńgesin jumsady dep aıyptaldy.

Sotta prokýror men jábirlenýshiler aıyptaýdy tolyq qoldap, kúdiktini 12 jylǵa bas bostandyǵynan aıyrýdy surady.

Aıyptaýshy tarap aıǵaq retinde qamaýǵa alynǵannan keıin sottalýshynyń kinásin moıyndaǵanyn, qylmys quraly – sottalýshynyń DNQ izi tabylǵan jábirlenýshiniń krossovkasynan shilter, jábirlenýshiniń tólem kartasyndaǵy sottalýshynyń satyp alǵan zattary týraly málimetter jáne basqa da qujattardy usyndy.

Sottalýshy óz kinásin tolyq moıyndamaı, kisi óltirý kezinde jábirlenýshiniń qoǵamdyq orynda bolǵanyn, ony ártúrli adamdar kórgen degen nusqany alǵa tartty.

Sotta kýágerler sottalýshynyń olarmen birge oıyn alańynda bolǵanyn rastady.

Jábirlenýshiniń sottalýshyǵa bank kartasyn odan buryn tapsyrǵanyn da anyqtady.

Sotqa deıingi tergeý barysynda sottalýshy R. óz kinásin moıyndaýdan bas tartyp, tekserýde bul fakti rastamalǵanymen, oǵan fızıkalyq qysym jasalǵanyn túsindirdi.

«Alqabıler jasyryn daýys berý qorytyndysy boıynsha R-ny kisi óltirý jáne urlyq jasaǵany úshin kináli emes dep tanyp, qylmys jasaýǵa qatysqany týraly aıǵaqtardyń joqtyǵy úshin aqtady. Úkim zańdy kúshine engen joq», - dep habarlady qalalyq sot.