Almatyda Dostyq úıinde tuńǵysh kınobal ótti (FOTO)
ALMATY. QazAqparat - Almatyda Dostyq úıinde tuńǵysh kınobal ótti. Qaıyrymdylyq sharasyn Qazaqstan halyqtary Assambleıasynyń orystar qoǵamy uıymdastyrdy.
Dostyq úıine jınalǵan 100-den astam adam Qazaqstanda turyp jatqan 130 etnostyń ulttyq bılerin lezgınka, orys kadrılııasy, grek bıi, vals, qara jorǵa bıin bıledi. «Bul dostyqtyń merekesi boldy. Biz bul sharaǵa osy dostyǵymyzdyń arqasynda bir tıyn da jumsamadyq. Kerisinshe uıymdastyrylǵan sharadan azyn-aýlyq qarjy jınap, ony mádenı damýymyzǵa baǵyttaıtyn boldyq. Ol qarjyǵa ulttyq kostıýmder tigiletin boldy. Shyn máninde búgin Qazaqstan halyqtarynyń arasyndaǵy tatýlyq pen yntymaqtyń baǵa jetpes baılyq ekeni anyq», - dedi uıymdastyrýshylardyń biri Olga Nagaeva. Qazaqstannyń eńbek sińirgen bıshisi Nıkolaı Jýk pen Vera Lıahovskaıa «Derjı Karmen shıre» kompozıtsııasyn usyndy. Sondaı-aq, kópshilik Almatydaǵy oqýshylar saraıy ónerpazdarynyń, «Sıýrprız» bı ansambliniń ónerin tamashalady.Aty aıtyp turǵandaı, atalǵan shara tek bı merekesi bolǵan joq. Munda Qazaqstannyń jańadan táı-táı basyp kele jatqan rejısserleriniń «Djýletta na pensıı» fılminiń tusaýkeseri ótti. Atalǵan týyndy buǵan deıin Zagreb pen Nıý-Iorkte ótken eýrazııalyq kınofestıvalderde júldeli oryn alǵan bolatyn. Sondaı-aq, jıylǵan qaýym nazaryna Qazaqstandaǵy orystar qoǵamynyń eki beınebaıany usynyldy. Bir týyndyda «Akvafon» toby Qazaqstanǵa degen mahabbatyn jetkizse, ekinshisinde Reseıdiń 83 qalasyna ánmen saıahat jasalǵan. Uıymdastyrýshylardyń aıtýynsha, bul beınebaıanǵa qazaqstandyq rekordtar kitaby KInES qyzyǵýshylyq bildirip otyr. Óıtkeni, bul 83 qalanyń aty atalǵan tuńǵysh klıp.
