Almatyda donor qanyna tapshylyq joq
Byltyr Almaty qalasyndaǵy respýblıkalyq qan ortalyǵynda 11 myń lıtr qan jáne onyń komponentteri jınaldy.
Kún saıyn qan ortalyǵynda 70-100 donor qabyldanady. Búginde mekeme Almaty qalasy men Almaty oblysynyń 20-dan astam medıtsınaq uıymyna qyzmet kórsetedi.
Ortalyq mamandarynyń aqparaty boıynsha, qazirgi ýaqytta qalada qan tapshylyǵy joq. Ortalyqta zamanaýı jabdyqtar ornatylǵan. Barlyq álemdik jáne halyqaralyq standarttarǵa sáıkes keletin donor qany komponentterin daıyndaýdyń, testileýdiń jáne onyń qosymsha qaýipsizdigin qamtamasyz etýdiń zamanaýı ádisteri engizilgen.
«Jeksenbiden basqa kúnderi qan ortalyǵyna saǵat 08:00-den 15:00 aralyǵynda kelip, qan tapsyryp, donor bola alasyz. Anyqtama úshin 8 727 338 23 80 telefonyna qońyraý soǵýǵa bolady»,- dep habarlady ortalyqtan.
Donor qan tapsyrar aldynda durys tamaqtanýy jáne suıyqtyqty kóp ishýi kerek. Bul kúni maıly, tuzdy, qýyrylǵan, aşy, ystalǵan tamaqtardy, sondaı-aq sút ónimderi men jumyrtqa jemegeni abzal. Tátti shaı, djem, nan, pisirilgen jarma, makaron, shyryndar, mıneraldy sý, kókónister, jemister jegen paıdaly.
«18 jastan asqan kez kelgen saý adam, jynysy men kásibine qaramastan, donor bola alady. Árbir donor qan tapsyrmas buryn medıtsınalyq tekserýden ótedi. Qan tapsyrǵannan keıin de, kóp jyldar ótse de donorlarǵa júrgizilgen saýalnamalar olardyń densaýlyqtarynda eshqandaı aýytqýlardy anyqtaǵan joq. Sonymen qatar ishimdik jáne quramynda aspırın men analgetıgi bar dári-dármekterdi ishýge bolmaıdy. Qan tapsyratyn kúni tańǵy as ishý kerek. Qan tapsyrardan bir saǵat buryn temeki shegýden bas tartqan abzal», - dep atap ótti qan ortalyǵynan.
Qan ortalyǵynyń málimetinshe, qan donory bolý – erikti shara. Halyqaralyq zertteýlerge sáıkes, bir ret qan ótkizý arqyly adamdar orta eseppen úsh adamǵa kómek kórsetedi. Odan bólek, udaıy túrde qan ótkizip otyrý arqyly adamdar óz ómirin 5-7 jylǵa uzartady.
Dúnıejúzilik donor kúnine oraı, únemi qan tapsyratyn 16 donor ortalyqtan alǵys hat pen estelik syılyqtar aldy.
