Almatyda dızel otynymen júretin atvobýstardy satyp alýǵa tyıym salynbaq

ALMATY. QazAqparat - Ekologııa mınıstrligi Almatyda janarmaı stansalaryn baqylaýdy kúsheıtip, dızel avtobýstaryn shekteýdi usyndy, dep habarlaıdy QazAqparat tilshisi.

Bul týraly onlaın jıyn barysynda QR Ekologııa, geologııa, tabıǵı resýrstar mınıstrliginiń Ekologııalyq retteý jáne baqylaý komıtetiniń tóraǵasy Zulpyhar Joldasov aıtty.

«Qoǵamdyq kólikterdi metan gazyna kóshirý jumystaryn jalǵastyrý kerek. Bıyl 500 avtobýs bolsa, 2023 jyly bul kórsetkish 2000-ǵa jetýi tıis. Sonymen qatar, dızel otynymen júretin avtobýstardy satyp alýdy zań boıynsha shekteý kerek. Janarmaı quıý stansalarynda 4 jáne 5 ekologııalyq klasqa jatatyn janarmaı ǵana satylýyn qadaǵalaý kerek», - dedi Zulpyhar Joldasov.

Qalanyń ekologııamen baılanysty máselelerin sheshýge baǵyttalǵan Jol kartasyn ázirleýge baılanysty ekologııalyq belsendiler bas qosqan.

Spıker osy maqsatta avtokólikterdi tehnıkalyq baqylaýdan ótkizetin ortalyqtardyń jaýapkershiligin arttyrýdy usyndy.

«Máselen Eýropa elderinde ekologııalyq talaptarǵa saı kelmeıtin avtkólikterdiń júrýine ruqsat bergeni úshin tehnıkalyq baqylaý ortalyqtary jaýapty bolady. Bizde tehnıkalyq ortalyqtardyń jaýapkershiligi tıimdi qarastyrylmaǵan. Olardyń jumysyna baqylaý joq», - dedi Zulpyhar Joldasov.

Buǵan deıin komıtet tóraǵasy Almatynyń ekologııalyq lastanýyna qatysty málimetterdi jarııalaǵan bolatyn.