Almatyda dızaınerdiń ólimine kúdikti ustaldy
ALMATY. QazAqparat - Almatyda dızaıner Sábıt Bisen kisi qolynan qaza tapty, dep habarlaıdy QazAqparat tilshisi.
Dızaınerdiń qazasy týraly onyń dostary men áriptesteri áleýmettik jelide habarlady.
Almaty qalalyq Polıtsııa departamentiniń málimetinshe, soqqyǵa jyǵylǵan adam týraly aqparat polıtsııaǵa 18 qazanda túngi saǵat ekiler shamasynda túsken. «102» pýltine qońyraý shalýshynyń aıtýynsha, belgisiz er adamdar aldymen aýlada janjaldasqan, sodan keıin tóbeles bastalǵan, nátıjesinde olardyń biri jerge qulap, ekinshisi qylmys ornynan qashyp ketken.
«Oqıǵa ornyna kelgen, medıtsınalyq brıgada er adamnyń kóz jumǵanyn aıtty. Onyń jeke basy birden anyqtaldy - 1989 jyly týǵan B. degen azamat. Osy qylmysqa qatysy bar degen kúdikpen 1991 jyly týǵan D. atty azamat ustaldy. Ol kinásin birden moıyndady. Belgili bolǵandaı, dızaıner kúdiktiniń qaryndasynnyń jigiti bolǵan»,– dep habarlady qalalyq Polıtsııa departamentiniń baspasóz qyzmeti.
Kúdikti ýaqytsha ustaý ızolıatoryna qamaldy.
«Bul fakt Bostandyq aýdandyq polıtsııa basqarmasynda QR QK 99-baby, 1-bólimi boıynsha tergelýde. Tergeý amaldary Polıtsııa departamenti basshylyǵynyń baqylaýynda»,– dep atap ótti polıtsııadan.
