Almatyda Dinmuhamed Qonaevtyń týǵanyna 100 jyl tolýyna arnalǵan saltanatty jıyn ótedi
ALMATY. 5 qańtar. QazAqparat /Erlik Erjanuly/ - Almatyda 12 qańtarda Qazaqtyń Abaı atyndaǵy memlekettik opera jáne balet teatrynda kórnekti memleket jáne qoǵam qaıratkeri Dinmuhamed Qonaevtyń týǵanyna 100 jyl tolýyna arnalǵan saltanatty jıyn ótedi.
Bul jaıly búgin Almatyda D.Qonaev týraly fotoalbomnyń tusaýkeserinde aıtyldy. Fotoalbomnyń qurastyrýshysy, "M. Áýezov murajaı-úıiniń" dırektory Dıar Asqaruly Qonaevtyń aıtýynsha, mereıtoılyq shara bul kúni D. Qonaev páter-murajaıynyń ashylýymen bastalady. Bul buǵan deıin jumys istep kelgen D. Qonaev murajaı-úıiniń jádigerlik bóliminiń jalǵasy bolmaq. Odan keıin D. Qonaev eskerkishine gúl shoǵyn qoıý rásimi jasalyp, saltanatty jıyn men kontsert bolady.
"100 jyldyqqa arnalǵan sharalar jyl boıy elimizdiń ózge óńirlerinde óz jalǵasyn tabady. Máselen mamyr aıynda Baqanasta eskertkish kompozıtsııa ashylady. Sondaı-aq Taldyqorǵanda bıýst qoıylmaq. Budan bólek "Qazaqfılm" kınostýdııasy, "Habar" agenttigi men Soltústik Qazaqstan oblystyq telestýdııasynda 3 derekti fılm túsirilip jatyr. Odan keıin Astanada iri ǵylymı konferentsııa uıymdastyrylady", - deıdi Dıar Asqaruly.
