Almatyda Dinmuhamed Qonaevtyń eskertishine gúl shoqtary qoıyldy
ALMATY. Qańtardyń 12-si. QazAqparat / Ádilet Musahaev / - Búgin Almatyda memleket, qoǵam jáne saıası qaıratker Dinmuhamed Ahmetuly Qonaevtyń týǵan kúnine oraı ony eske alý sharasy ótti,
dep habarlaıdy QazAqparat.
Almaty qalasynyń mádenıet basqarmasy men D.A. Qonaev murajaı-úıiniń uıymdastyrýymen «50 jyl, 6 aı, 2 kún birge ótken ǵumyr» kórmesiniń ashylýy bolyp, «D.A. Qonaev memleket jáne qoǵam qaıratkeri» atty arnaıy ekskýrsııa júrgizildi. Sonymen qatar atalmysh qaıratkerdiń eskertkishine gúl shoqtaryn qoıý rásimi ótti jáne «S lıýbovıý po jıznı» fılmniń bastamasy kórsetildi.
Sharaǵa D. Qonaevtyń týǵan-týystary, qyzmettes áriptesteri, qoǵam qaıratkerleri, JOO stýdentteri, mektep oqýshylary jáne Almaty qalasynyń turǵyndary keldi.
«Eki jyldan keıin halqymyz Dımekeńniń 100 jyldyǵyn atap ótedi, búgingi jınalǵan jurttyń kóptigi onyń esiminiń óshpeıtindigin kórsetedi. Ol kisi óte erekshe týǵan tulǵa, óte bilimdi adam. Onyń eń jaqsy bir qyry - uıymdastyrýshylyǵy edi. Jas kezinde Maǵjan Jumabaevtyń óleńderin oqyǵan, Muhamedjan Tynyshbaevty ómirlik úlgi etken, ony ózi aıtyp júretin. Men ómir boıy Dımekeńe alǵys sezimde bolam», deıdi mádenıettanýshy Murat Áýezov.
«Búgin qazaqtyń ardaqty, bir týar azamaty D. Qonaevty eske alýǵa murajaıyna kelip otyrmyn. Halqy úshin eren eńbek etken azamattyń otbasy, qyzmetinen syr shertetin zattardy murajaıdan tamashalaýdamyz. Jastarymyz osyndaı azamattan úlgi alyp, keleshekte qazaqtyń dańqyn kótersin degen tilektemin. Men elge eńbegi sińgen dárigermin, osy Dımekeńniń qolynan maqtaý qaǵazyn alǵanymdy eshqashan umytpaımyn. Ol kisiniń tusynda kóptegen ádemi záýlim ǵımarattar, Almaty sý arnasy, Medeý muz aıdyny jáne kóptegen mádenı oshaqtar salyndy. Sondaı-aq adamdardyń tynyǵýy úshin kóptegen shıpajaılar sol kisiniń bastamasymen salynǵan edi», deıdi elimizge eńbegi sińgen dáriger Semen Sherııazdanov.
