Almatyda Dinmuhamed Qonaevtyń 100 jyldyǵyna oraı memorıaldyq páter murajaıy ashyldy
ALMATY. 12 qańtar. QazAqparat /Názıra Eleýhan/ - Búgin Almatyda qala ákimi Ahmetjan Esimovtiń qatysýymen asa kórnekti memleket jáne qoǵam qaıratkeri Dinmuhamed Qonaevtyń 100 jasqa tolýyna oraı memorıaldyq páter murajaıy ashyldy.
"Búgin murajaı isi tarıhynda erekshe kún. Óıtkeni uly tulǵa uzaq jyldar turǵan úıi Elbasynyń tikeleı tapsyrmasymen memorıaldyq páter murajaıy retinde ashylyp otyr. Munda Dinmuhamed Ahmetuly Qonaev otbasymen 1967 jyldan 1993 jylǵa deıin turdy. Ol kisiniń qurmetine ashylǵan birinshi murajaı uly tulǵanyń týǵannan tulǵa retinde qalyptasýyna deıingi ómir jolyn baıandasa, bul murajaıdyń ereksheligi - munda kelýshiler Dinmuhamed Ahmetuly Qonaevtyń turǵan páterin, páter ishindegi zattaryn, qolymen ustaǵan dúnıelerin, buǵan deıin kópshilik kórmegen 700-ge jýyq ottyq, qarý-jaraq, kollektsııalaryn, 5000-nan asatyn kitaphanasyn, ár memleket basshylary men dostary syılaǵan syılyqtaryn jáne taǵy da basqa kóptegen qundy jádigerlerdi kóre alady. Murajaıdy jasaýda esh qıyndyq bolǵan joq, munda bárin ómir súrgen kezinde zattary qalaı turdy, solaı qaldyrdyq. Páterdiń ishin ol kisiniń jańa ǵana bólmeden shyqqan sııaqty áser qaldyratyndaı etip jasadyq",-dedi Dinmuhamed Qonaev atyndaǵy páter murajaıdyń dırektory Jánııa Serikbaeva.
2002 jyly D.A.Qonaevtyń 90 jasqa tolýyna oraı ashylǵan D.A.Qonaev atyndaǵy murajaı-úıiniń dırektory Bolysbek Battalhanovtyń aıtýynsha, bul páter murajaı TMD elderinde arasynda uzaq jyl eldi basqarǵan el basshysyna ashylǵan alǵashqy páter murajaı. "Bul murajaıdyń ereksheligi de osynda",-dep atap ótti ol.
Páter murajaı demalys kúninen basqa barlyq kúnderi jumys isteıtin bolady.
