Almatyda dindar áıelder quraq kórpe tigýdi úırendi

ALMATY. QazAqparat – Almatyda 29 dindar áıel tigin kýrsyn támamdady, dep habarlaıdy QazAqparat tilshisi.

Mundaı sharany Almaty qalasy qoǵamdyq damý basqarmasynyń janyndaǵy «Keńes berý jáne ońaltý ortalyǵy» uıymdastyrdy.

«Kýrsty ótkizýdegi maqsatymyz - úı sharýasymen aınalysatyn názik jandar úshin qosymsha tabys kózi retinde ártúrli kıim úlgilerin, qyz jasaýyna qajetti kórpesheler tigip, tapsyrys qabyldap, aldaǵy ýaqytta óz kásibin ashýyna yqpal jasaý. Olar ártúrli formadaǵy quraq túrlerin úırenip, óz qolymen kórpeshe tigip shyqty. Bul bir jaǵynan áıelderdi qoǵamdyq ómirge psıhologııalyq, ekonomıkalyq turǵydan beıimdese, ekinshi jaǵynan ulttyq qundylyqtarǵa jaqyndastyryp, oı-pikirin ózgertýge yqpal etedi», - deıdi teolog Nazerke Jetpisbaıqyzy.

29 áıelge quraq quraýdy Almaty qalasy ortalyq meshiti janynan ashylǵan tigin úıirmesiniń ustazy Sandýǵash Sársenbaıqyzy jáne «Ryskúl» jeke sheberhanasynyń mamany Aınur hanym úıretti.

Birneshe kúnge sozylǵan kýrstan soń áıelderge arnaıy sertıfıkat tabys etildi.

Qatysýshylar osyndaı suranysqa ıe kásipti úırenýge kómektesken «Keńes berý jáne ońaltý ortalyǵynyń» basshylyǵyna alǵys aıtty.

Olar oqytý barysynda úırengenderin ári qaraı jalǵastyryp, kúndelikti turmysta qoldanýǵa nıetti ekenin jetkizdi.