Almatyda Dına Nurpeıisovanyń 150 jyldyǵyna arnalǵan «Uly kúıshi - Dına» atty merekelik shara ótti

Sharada K.Baıseıitova atyndaǵy mýzyka mektebiniń oqýshylary, A.Jubanov atyndaǵy mýzyka mektebiniń shákirtteri, Qurmanǵazy atyndaǵy Qazaq Ulttyq konservatorııasynyń túlekteri D.Nurpeıisovanyń kúılerin oryndady. A.V.Seleznev atyndaǵy horeografııalyq ýchılışeniń jas ónerpazdary qatysyp, óz ónerlerin kórsetti. Sondaı-aq, Aıgúl Úlkenbaeva da merekege qatysyp kúı shertti.

Oǵan qosymsha murajaı qoryndaǵy D.Nurpeıisovanyń fotosýretteri jáne uly dombyrashynyń ómiri men óneri jaıly syr shertetin kitaptar qoıylǵan kórme ashyldy.

Merekelik sharaǵa mádenıet jáne óner qaıratkerleri, sonymen qatar qala jurtshylyǵy qatysty.

«Búgin jalpy qazaq halqy úshin úlken este qalatyn kún. Dına sheshemizdiń kórmesi ashylyp halyqqa usynylyp jatyr. Bizder Eýropadaǵydaı úlken záýlim úıler salǵan joqpyz. Bizder álem tań qalatyndaı qurylystar júrgizgen joqpyz. Biraq, sonyń esesine bizdiń halqymyz álemde teńdesi joq sóz ónerin qalyptastyryp ketti. Jyr, án-kúı álemin jasady. Mundaı baılyq álemde joq dep oılaımyn. Bizdiń aqyn-jyraý, sazgerler jaıly neshe túrli pikirler aıtylyp jatyr. Sol pikirlerdiń birinde, Qurmanǵazy eýropalyq bilim alsa, onda ol búkil álemdik Sholpan juldyz bolar edi delingen. Men aıtar em, ol eýropalyq bilim almaı-aq, Sholpan juldyzy. Nege biz olarmen teńesýimiz kerek. Nege biz solardyń dárejesinde juldyz bolýymyz kerek. Biz úshin ol teńdessiz talant. Mine, sondaı tulǵadan bata alǵan Dına apamyz da úlken juldyz. Búgingi uıymdastyrylyp otyrǵan shara da meni qýantyp otyr. Mundaı dúnıeler tek osy murajaı qabyrǵasynda ǵana emes, barlyq mádenı ortalyqtarda jalǵasady dep senemin» - dedi QR Eńbek sińirgen qaıratkeri Abdulhamıt Raıymbergenov.