Almatyda Dına Nurpeıisovanyń 150 jyldyǵyna arnalǵan saltanatty kesh ótti
ALMATY. 6 jeltoqsan. QazAqparat /Názıra Eleýhan/ - Abaı atyndaǵy opera jáne balet teatrynda Almaty qalasy ákimdiginiń mádenıet basqarmasynyń uıymdastyrýymen Qazaq SSR-nyń halyq ártisi,
ataqty dombyrashy, kúıshi, halyq sazgeri, uly Qurmanǵazynyń shákirti Dına Nurpeıisovanyń 150 jyldyǵyna arnalǵan saltanatty kesh bolyp ótti.
Ǵasyr sańlaǵynyń 150 jyldyǵyna arnalǵan keshke elimizge tanymal óner sheberleri men kúı sańlaqtary, Dına Núrpeıisovanyń búgingi izbasarlary -kúıshi Aıgúl Úlkenbaeva, Dına Nurpeıisova atyndaǵy kúıshiler saıystarynyń ár jylǵy jeńimpazdary Asylaı Ápenova, Sabıra Bıbatyrova, Aqtoty Dúısebaeva, Araılym Shalabaeva, Almagúl Zeıdýalıeva, sondaı-aq Dına ónerin jalǵastyrýshy jas urpaq - «Kókil» mýzyka mektep-kolledji men K.Baıseıitova atyndaǵy mýzyka mektebiniń jas daryndary qatysty.
Keshte halqymyzdyń shyn mánindegi maqtanyshyna aınalǵan dáýlesker kúıshiniń «Kógen túp», «On altynshy jyl», «Baıjuma», «Qaraqasqa at», «Bulbul», «Ótti dáýren», «Otan», «Jiger», «Ásem qońyr» «Qazaqstan» jáne t.b. shoqtyǵy bıik kúıleri oryndaldy.
Toı shymyldyǵy Qurmanǵazy atyndaǵy Memlekettik akademııalyq ult aspaptar orkestriniń oryndaýyndaǵy Dına Núrpeıisovanyń «Toı bastar» kúıimen ashyldy.
Ashylý saltanatynda Almaty qalasy ákiminiń orynbasary Serik Seıdýmanov Dına Nurpeıisovanyń 150 jyldyǵy elimizde keńinen atalyp jatqandyǵyn jáne baýyrlas Túrik elinde merekelengenin atap ótip: «Qurmanǵazydan tálim alǵan elimizdiń birtýar talanty Dına Nurpeıisova óziniń shyǵarmashylyǵymen barsha halqymyzdy kúı óneriniń qýanyshyna bóledi. Kúıshiniń týyndylary ulttyq mýzykalyq boıaýymen, tereń mazmunymen daralanǵan. Dına Nurpeıisova shyǵarmashylyq jolynda halqymyzdyń mýzyka ónerindegi ótkeni men búginin sabaqtastyryp, eliniń arman-ańsaryn, úmit-tilegin abyroımen arqalady. Dara kúıshiligimen, talantty týyndylarymen Dına Núrpeıisova qazaq kúıleriniń órisin uzartyp, óresin bıiktetti. Búgingi kúni daryndy kompozıtordyń qarymdy óneri halqymyzdyń rýhanı ómirine zor úlesin qosyp, el qazynasynyń «Altyn qoryna» enip otyr»,-dedi.
Kesh barysynda ónersúıer qaýym kúıshi - kompozıtor jaıly fılmnen úzindi tamashalap, Dına Nurpeıisovanyń daýysy jazylǵan taspany tyńdady.
