Almatyda din qyzmetkerleri dinı biliktilik boıynsha attestatsııadan ótip jatyr (FOTO)
ALMATY. QazAqparat- Búgin Qazaqstan musylmandary dinı basqarmasynda Almaty qalasynyń din qyzmetkerleri ımamdar forýmynda qabyldanǵan tórt qujat boıynsha attestatsııadan óte bastady. Saraptaý komıssııasynyń jumysyna Bas múftı Erjan qajy Malǵajyulynyń ózi qatysty.
Igi shara barysynda Bas múftı Qazaqstan musylmandary dinı basqarmasynyń ımamdardyń bilimin arttyrýǵa asa mán berip otyrǵandyǵyn aıtty.
«Islam dini - ǵylym-bilim dini. Islam dini paıda bolǵaly musylmandardy ǵylym-bilimge shaqyrýmen keledi. Dinı basqarma osy baǵytta elimizde dinı bilim berýdi damytýdyń tujyrymdamasyn qabyldaǵanyn jaqsy bilesizder. Onda Qazaqstan musylmandary dinı basqarmasynyń dinı bilim berý júıesin qalyptastyrý kózdelgen. Attestatsııalaý jumysynyń maqsaty - din qyzmetkerleriniń dinı bilim deńgeıin anyqtaı otyryp, saýatyn jetildirýge jaǵdaı jasaý, múmkindikter týǵyzý», - dedi Bas múftı Erjan qajy Malǵajyuly.
Din qyzmetkerlerin attestatsııalaý kezeń-kezeńmen ótedi. Birinshi kezekte Almaty qalasynyń aýdan meshitteriniń bas ımamdary, ekinshi kezekte qala meshitteriniń naıb ımamdary, azanshylary men is basqarýshylary ótedi.
Qala ımamdary «Qazaqstan musylmandarynyń Tuǵyrnamasy», «Shynaıy musylmannyń tulǵalyq beınesi», «Imamnyń tulǵalyq kelbeti», «Qazaqstan musylmandary dinı basqarmasy qyzmetkeriniń etıkasy» tóńireginde synaq tapsyrady. Bılet boıynsha keletin suraqtarǵa din qyzmetkerleri aýyzsha jáne jazbasha jaýap beredi. Bul shara din qyzmetkerleriniń bilimi men biliktiligine jan-jaqty jáne ádil baǵa berý, sondaı-aq ımamdardyń bilimin úzdiksiz jetildirý maqsatynda ótkizilip otyr.
Aıta ketelik, Almaty qalasy boıynsha barlyǵy 150 din qyzmetkeri synaqtan ótedi. Emtıhan eki kúnge jalǵasady. Saraptaý komıssııasynyń jumysyna Sharıǵat jáne pátýa bólimi meńgerýshisiniń orynbasary Sansyzbaı Shoqanov, QMDB din isteri bóliminiń basshysy Kamaljan Turdybaev jáne Almaty qalasynyń bas ımamy Nurbek Esmaǵanbet qatysýda.
