Almatyda Din isteri agenttiginiń konsýltatsııalyq-saraptamalyq keńesiniń otyrysy boldy
ALMATY. 30 mamyr. QazAqparat - Keshe Almatyda Din isteri agenttiginiń Qazaqstandaǵy dinı ahýal máseleleri jónindegi konsýltatsııalyq-saraptamalyq keńesiniń kóshpeli otyrysy ótti.
Agenttik tóraǵasynyń orynbasary Ǵalym Shaıkınniń aıtýynsha, onyń buǵan deıingi birneshe májilisi Astana qalasynda ótken bolatyn. Bul joly ol agenttik basshylarynyń usynysymen Fılosofııa, saıasattaný jáne dintaný ınstıtýtynda jalǵasyp otyr. Óıtkeni Astanadaǵy basqosýǵa ınstıtýttyń ókilderi qatysqanmen, keńestiń Almatydaǵy músheleriniń bári birdeı qatysa almaǵan bolatyn.
«Astanadaǵy otyrystarda aqparat quraldarynyń jumystary, úgit-nasıhat jumystaryn uıymdastyrý, áleýmettik jáne ǵylymı zertteýlerdiń nátıjeleri men maqsattary qaralǵan bolatyn. Bul joly dinı saraptamany uıymdastyrý, júrgizý jumystaryn jetildirý, sonymen birge, Qazaqstandaǵy dinı jaǵdaıdy boljaý jáne ǵylymı taldaý máseleleri qarastyryldy», - deıdi keńes tóraǵasy Ǵ.Shaıkın. Saıasattaný ǵylymdarynyń kandıdaty Ǵalym Nurmaǵambetulynyń aıtýynsha, bul eki máselege de Fılosofııa, saıasattaný jáne dintaný ınstıtýtynyń qatysy bar. Sondyqtan ınstıtýt ǵalymdarynyń pikirlerin tyńdap, usynystaryn talqylaý keńes jumysyn jetildirýge óz septigin tıgizetin bolady.
