Almatyda depýtattar tezirek sot-medıtsınalyq saraptama ortalyǵyna jańa ǵımarat salýǵa shaqyrdy
ALMATY. QazAqparat - Almatyda májilis depýtattary Qazaqstandaǵy sot-medıtsınalyq saraptama ortalyǵynyń jańa ǵımaratyn tezirek salýǵa muryndyq bolýǵa shaqyrdy, dep habarlaıdy QazAqparat tilshisi.
Búgin Almatyda QR Parlamenti Májilisiniń depýtattary Svetlana Bychkova men Záýresh Amanjolova Almaty sot saraptamalyq ınstıtýty bazasynda sot saraptama mamandarymen kezdesip, «100 naqty qadam» Ult jospary týraly óz tájirıbelerimen bólisti. Jıynda Májilis depýtaty Záýresh Amanjolova eskirip turǵan sot-medıtsınalyq ortalyqqa tezdetip jańa jańa ǵımarat salý qajettigin aıtty.
«Biz depýtat Svetlana Bychkovamen sot-medıtsınalyq saraptama ortalyǵyna, máıithanalyq zerthanaǵa baryp kórdik. Biz depýtattar bolyp, jańa basshylyq, qala bıligi birlesip, jańa ǵımaratty daıyndap berý jaǵyn qamdaıyq. Sot medıtsınalyq saraptamany, sot saraptamasyna biriktirgende jetken jetistigimiz osy ǵımarat dep aıta alatyndaı bolsaq. Ózderińiz bilesizder, qazir bizde oqys oqıǵa kóp, ólim-jitim kóp. Tezirek qarajat taýyp, jobalyq-smetalyq qujattamasyn ázirlep, qurylysty bastaýǵa muryndyq bolaıyq», - dedi depýtat.
Kezdesýde Záýresh Amanjolova QR Parlamenti Májilisi 6-shy shaqyrymynyń jumysy nátıjeli bolǵanyn aıtty.
«Parlamenttiń ekinshi sessııasynda 111 zań jobasy qaralyp, onyń 84-i qabyldandy. Osy zańdardyń 15-ine depýtattar bastamashyl boldy. 111 zań jobasynyń 62-ine Prezıdent qol qoıdy. 30 maýsym kúni Medıtsınalyq saqtandyrý júıesi boıynsha zań jobasyna qol qoıyldy», - dedi ol.
