Almatyda densaýlyqqa qaraı 5 sátti qadam jasaldy
ALMATY.QazAqparat - Almatyda QR DSM bastamasymen uıymdastyrylǵan «Densaýlyqqa qaraı 7 qadam» marafonynyń 5 qadamy boıynsha is-sharalar uıymdastyrylyp jatyr.
Bul týraly QazAqparat tilshisine qalalyq Densaýlyq saqtaý basqarmasynyń baspasóz qyzmetiniń mamany Láıla Keńesbaeva aıtty.
Qazirgi tańda Almaty qalalyq Densaýlyq saqtaý basqarmasymen atalǵan qadamdar boıynsha júrgiziletin sharalardyń jospary bekitildi. Sáýirdiń 5-ine deıin otbasyn qurýdy, sábı súıýdi josparlaý, bosanýǵa daıyndyq, deni saý ana, deni saý bala mektepteriniń jumysy alǵa qoıylyp, profılaktıkalyq sharalar uıymdastyrylyp keledi.
«Naýryzdyń 12-sinen bastap dóńgelek ústelder, onkodıspanserde ashyq esik kúnderi, túrli aktsııalar, sporttyq sharalar, dárigerlerdiń tegin qabyldaýlary ótkizildi. Al naýryzdyń 27-sinen 7 sáýirge deıin áleýmettik turǵydan az qamtylǵan otbasylardy, balalar úıiniń tárbıelenýshilerin profılaktıkalyq tekserýden ótkizý júrgizilip jatyr», - dedi ol.
Qalalyq Salaýatty ómir saltyn qalyptastyrý ortalyǵynyń dırektory Gúlsara Súleımenova bul marafonnyń turǵyndardyń densaýlyǵyn jaqsartýda mańyzy zor ekendigin aıtady.
«Mundaı aýqymdy sharanyń basty maqsaty - adamdardyń óziniń densaýlyǵyna degen áleýmettik jaýapkershiligin arttyrý bolyp tabylady. Ár adam aýyrmaýdyń jolyn izdep, salaýatty ómir saltyn ustanýy kerek. Marafonnyń ár qadamy ár jas sanatyndaǵy adamdardyń densaýlyǵyn jaqsartýǵa baǵyttalǵan. Bul jerde bala men ana, otbasy, qarttar da eleýsiz qalmaǵan», - deıdi Gúlsara Súleımenova.
