Almatyda «Densaýlyq kúni» festıvali ótkizildi
ALMATY. QazAqparat- Búgin Almaty polıgrafııa kolledjiniń sport alańynda «Densaýlyq kúni» festıvali ótkizildi. Oǵan osy oqý ornynyń barlyq 600 oqýshysy men oqytýshy quramy qatysty.
«Búgingi «Densaýlyq kúni» festıvali birinshi kezekte salamatty ómir saltyn nasıhattaýǵa jáne jastardy sportqa tartýǵa arnaldy. Óıtkeni, dál osyndaı aýqymdy sharalar jastardy tártipti bolýǵa, Otan aldyndaǵy jaýapkershilikterin sezinýge ıtermeleıdi. Sportpen aınalysatyn jáne eleýli jetistikke qol jetkizgen adam, ómirde de jaqsy azamat bolýǵa tyrysady», - dedi Almaly aýdandyq ákimdigi apparatynyń Mádenıet jáne tildirdi damytý bóliminiń bastyǵy Lázzat Mámedova.
Óz kezeginde Almaty polıgrafııa kolledjiniń dırektory Biláldın Ahmetov osyndaı aýqymdy sharalar jastardy patrıotyq rýhta tárbıeleýde mańyzdy ról atqaratyndyǵyn jetkizdi.
«Balanyń jamany joq. Balanyń barlyǵy jaqsy. Tek pedagogtar júregine jol taba almaǵan balalar bolady. Al eger jol tapsań, olardyń erekshe daryndy balalar ekendigine kóz jetkizesiń. Bul jerde balanyń júregine jol tabýda ulttyq sport oıyndarynyń orny erekshe. Sol úshin de jastardy patrıottyq rýhta tárbıeleý - búgingi festıvaldiń basty maqsattarynyń biri. Bul festıvalde birinshi oryn alý mindetti emes. Eń bastysy - qatysý», - dedi B. Ahmetov.
Aıta ketelik, búgingi festıval aıasynda jastar Halyqtyq-ulttyq sport túrleri jáne buqaralyq-saýyqtyrý dene shynyqtyrý klýbynyń qoldaýymen 20-dan astam oıyn túrleri boıynsha baqtaryn synady. Olardyń ishinde - gladıator, qol kúresi, tennıs, shaǵyn fýtbol, buqa tartys, basketbol, dartts, sekirme, kedergilerden sekirip ótý, voleıbol, qappen sekirý, gir kóterý, asyq atý jáne tumaq urý oıyndary bar.
Al oıyndarǵa qatysý boıynsha eshqandaı shekteý qoıylmady. Shara barysynda kolledj oqýshylary oıyndar boıynsha kýrsqa bólinip te jarysty. Shara sońynda kolledj oqýshylary men oqytýshylar quramy arasynda fýtbol oıyny ótkizildi. Jeńimpazdarǵa estelik syılyqtar men maqtaý qaǵazdary tabystaldy.
Aıta ketelik, Almaty qalalyq Dene shynyqtyrý jáne sport basqarmasy janyndaǵy Halyqtyq-ulttyq sport túrleri jáne buqaralyq-saýyqtyrý dene shynyqtyrý Klýby, Almaly aýdandyq ákimdigi, «Nur Otan» partııasynyń Almaly qalalyq fılıalynyń uıymdastyrýymen ótkizilgen búgingi shara QR Táýelsizdiginiń 25 jyldyǵy, Almaty qalasynyń 1000 jyldyǵyna jáne Elbasynyń «Qazaqstan-2050» strategııasyn júzege asyrýǵa baǵyshtaldy.
Endi «Densaýlyq kúni» festıvali basqa da kolledjderde jalǵasyn tabady.
