Almatyda Densaýlyq basqarmasynyń eks-basshysynyń isi basqa sotqa joldandy

ALMATY. QazAqparat - Almatyda №2 Medeý aýdandyq sotynda qalalyq Densaýlyq saqtaý basqarmasynyń burynǵy basshysy Serikbol Mýsınovtiń isi boıynsha aldyn ala sot tyńdaýy ótti, dep habarlaıdy QazAqparat tilshisi.

Aıyptalýshynyń qorǵaýshysy isti Bostandyq aýdandyq sotyna jiberýdi surady.

«Qylmystyq is qylmys oryn aldy degen jerde qaralýy tıis. Eger quqyqbuzýshylyq birinshi sotqa tıesili aımaqta bastalyp, ekinshi sotqa tıesili aımaqta aıaqtalsa, is aıaqtalǵan terrıtorııaǵa qaraıtyn sotta qaralýy tıis. Qalalyq prokýratýra qylmys bastalǵan jerdi naqty kórsetip tur - qalalyq prokýratýranyń ǵımaraty. Aıaqtalǵan jeri - prokýratýra ǵımaratynan tys, osy jerde 5 myń dollar kóleminde para berilgen», - dedi advokat.

Sottalýshy óziniń qorǵaýshylarynyń ótinishin qoldaıtynyn jetkizdi.

Al, memlekettik aıyptaýshy atalǵan ótinishti qabyldamaı, isti qaraýdy Medeý aýdandyq sotyna qaldyrýdy surady.

Sýdıa qylmystyq isti №2 Bostandyq aýdanyna baǵytaý týraly sheshim shyǵardy.

«Prokýratýra Bostandyq aýdany terrıtorııasynda ornalasqan. Ýaǵdalasqan 25 myń dollardyń qalǵan somasy 5 myń AQSh dollary prokýratýra ǵımaratynyń janynda berilgen», - dedi sýdıa Tursynhan Salyqov.

Eske salaıyq, Densaýlyq saqtaý basqarmasynyń burynǵy basshysy Serikbol Mýsınovqa qatysty para berdi degen kúdikpen is qozǵalǵan bolatyn.

Basqarma basshysy qyzmetinen 2018 jyly 20 qyrkúıekte bosatyldy.

Ol qalalyq basqarmany 2017 jyldyń qarashasynan beri basqaryp kelgen edi. Qyzmet jolyn Shyǵys Qazaqstan oblysy Aıagóz aýdandyq aýrýhanasynda ıntern-dáriger bolyp bastaǵan. Ár jyldary Semeı oblysy Densaýlyq saqtaý basqarmasynyń basshysy, Astana qalasy Farmatsevtıkalyq baqylaý basqarmasynyń basshysy, Mańǵystaý oblysy Densaýlyq saqtaý basqarmasynyń basshysy qyzmetterin atqarǵan.