Almatyda Denıs Ten atyndaǵy shákirtaqy taǵaıyndaldy

ALMATY. QazAqparat – Almatyda Olımpıada júldegeri, sportshy Denıs Tenniń atyndaǵy shákirtaqy taǵaıyndaldy. Qazaqstan Brıtan tehnıkalyq ýnıversıtetiniń rektoraty bul qarjylaı kómekti sporttan da, bilimnen de úzdik shyqqan úsh stýdentke beretin bolady, dep habarlaıdy QazAqparat tilshisi.

Aıta ketý kerek, sportshy osy oqý ornynyń magıstratýrasynda bilim alǵan bolatyn.

Saltanatty sharaǵa sportshynyń anasy Oksana Ten shaqyryldy.

«Oqý ornynyń basshylyǵy óz kúshterimen talantty jastardy qoldaý úshin ataýly shákirtaqy berip jatqany kóńil qýantady. Denıstiń de armany sol edi. Bul sharalar el jastarynyń sport, bilim salasynda damýyna, jastardyń boıyndaǵy patrıottyq sezimdi oıatýǵa yqpalyn tıgizeri sózsiz. Biz óz kezegimizde Qazaqstanda mánerlep syrǵanaý óneriniń damýyna barynsha úles qosyp jatyrmyz. Jaqynda І Halyqaralyq týrnır ótkizdik», - dedi anasy.

Al oqý ornynyń rektory Kenjebek Ibrashev shákirtaqyny ıelenýge 80 stýdent ótinim bergenin habarlady. Arnaıy komıssııa olardyń arasynan úzdik 3 stýdentti tańdap aldy.

«Denıs Ten QBTÝ Executive MBA Bıznes mektebiniń magıstranty bolatyn. Ol sporttaǵy eren jetistikterine qaramastan, oqýda da qyraǵylyq tanytyp, bizdiń stýdentterge jan-jaǵynan úlgi bola bildi. Sol úshin KBTÝ kınozalyna Denıs Tenniń esimin berdik. Endowment qorynyń kómegimen Denıstiń atyndaǵy shákirtaqy taǵaıyndaýdy sheshtik», - dedi Kenjebek Ibrashev.

Aıta ketý kerek, Ońtústik Koreıanyń Seýl qalasynda 6-11 qarasha arasynda mánerlep syrǵanaýdan Olımpıada júldegeri Denıs Tenniń shyǵarmashylyǵyna arnalǵan kórme ótti.

Kórmede túrli halyqaralyq saıystarda túsirilgen fotosýretter, qysqametrajdy fılm kórsetildi.