Almatyda demalys kúnderi polıtsııa kezekshiligi kúsheıtiledi

ALMATY. QazAqparat – Almaty qalasynyń Almaly aýdandyq polıtsııa qyzmetkerleri halyq kóp shoǵyrlanatyn jerlerde engizilgen shekteýlerdi saqtaý boıynsha kezekshilikti kúsheıtedi. Bul týraly onlaın brıfıng barysynda aýdan ákimi Bekqalı Torǵaev aıtty, dep habarlaıdy QazAqparat tilshisi.

Keshe Qazaqstanda, onyń ishinde Almatyda epıdemıologııalyq jaǵdaıdy turaqtandyrý maqsatynda qosymsha sharalar qabyldandy.

Osyǵan baılanysty, Almaty qalasynyń Almaly aýdanynda aldaǵy demalys kúnderi, ıaǵnı 20-21 maýsymda barlyq saýda, oıyn-saýyq ortalyqtary, saýda ortalyqtary, saýda úıleri, bazarlar, sýpermarketter, fıtnes ortalyqtardyń jumysy toqtatylady. Dámhanalar men meıramhanalar tek qana sanıtarlyq-epıdemıologııalyq normalardy saqtaı otyryp, jazǵy alańdarda ǵana jumys isteıtin bolady. Sondaı-aq saıabaqtarǵa, jaǵalaýlarǵa barýǵa tyıym salynady. Qoǵamdyq kóliktiń, onyń ishinde qala mańyndaǵy marshrýttardyń jumysy toqtatylady.

«Almaly aýdanynda 4 saýda, oıyn-saýyq ortalyǵy, 18 saýda úıi, 7 saýda ortalyǵy, 6 bazar, 43 fıtnes-ortalyq, 1 saıabaq, 22 tynymbaq, 5 býlvar, 15 jasyl aımaq, 1 bólý aımaǵy bar. Qyzmeti toqtatylǵan barlyq nysandarda sanıtarlyq-aldyn alý jáne epıdemııaǵa qarsy is-sharalar júrgiziledi. Almatylyqtarǵa qala boıynsha júrýdi shekteýdi, ásirese syrqattaný qaýpi qart adamdarǵa tónip tur, sondyqtan úıde bolýǵa keńes beremiz. Qala turǵyndarynan osy baǵyttaǵy sharalarǵa túsinistikpen qaraýlaryn suraımyz», - dedi Bekqalı Torǵaev.

Aıta ketý kerek, 18 maýsym kúni QR Premer-Mınıstri Asqar Mamınniń tóraǵalyǵymen QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysy ótti. Onda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq jaǵdaıdy turaqtandyrý boıynsha qosymsha sharalar qabyldandy.

Osyǵan baılanysty Almaty qalasynyń ákimi karantınniń kúsheıtilýine qatysty málimdeme jasaǵan edi.