Almatyda demalys kúnderi avtobýstar júrmeıdi
ALMATY. QazAqparat – Almatyda 20-21 maýsym kúnderi qoǵamdyq kólik marshrýtqa shyqpaıdy. Bul týraly búgin qala ákimi Baqytjan Saǵyntaev QR Premer-Mınıstri tóraǵalyǵymen QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysynan soń aıtty, dep habarlaıdy QazAqparat.
«Qaýipti indettiń ýshyǵa túsýine baılanysty Úkimet epıdjaǵdaıdy turaqtandyrý boıynsha jańa sharalardy qolǵa aldy. Osy oraıda Almatyda da karantın rejımin kúsheıtý boıynsha qosymsha sharalar qabyldandy.
Senbi-jeksenbi, ıaǵnı 20-21 maýsym kúnderi qoǵamdyq kóliktiń qyzmeti toqtatylady. Osyǵan baılanysty qala turǵyndaryn bul jumystarǵa túsinistikpen qaraýǵa shaqyramyn. Karantın sharalaryn bosańsytý – COVID-19-dyń órshýine ákep soqty. Qala turǵyndarynan kóshede júrýin shektetýin suraımyz. Ásirese qart adamdardyń úıde otyrǵany abzal», - dedi qala ákimi.
Odan bólek demalys kúnderi saıabaqtar, skverler men jaıaý júrginshiler aımaǵy, ózender men sý qoımalarynyń jaǵalaýlary, taý shańǵysy kýrorttary jáne basqa da qoǵamdyq oryndar, iri saýda jáne qyzmet kórsetý nysandary jabylady.
Qosymsha aqparattardy 1308 nómirindegi call-ortalyqtan bilýge bolady.
Buǵan deıin QR Premer-Mınıstri Asqar Mamınniń tóraǵalyǵymen QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) selektorlyq otyrysy ótkenin jazǵan edik. Onda QR Prezıdenti Qasym-Jomart Toqaevtyń tapsyrmasyna sáıkes Qazaqstandaǵy epıdemıologııalyq jaǵdaıdy turaqtandyrý boıynsha qosymsha sharalar qaraldy.
