Almatyda «Delta» shtamynyń úlesi 78 paıyzdy quraıdy
ALMATY. QazAqparat - Almaty qalasy sanıtarlyq-epıdemıologııalyq baqylaý departamentiniń basshysy Jandarbek Bekshın qalada koronavırýstyń jańa shtamdarynyń aınalymy týraly aıtty, dep habarlaıdy QazAqparat tilshisi.
Onyń sózinshe, Almatyda epıdemıologııalyq ahýal jáne ınfektsııanyń taralýyna jol bermeý karantın talaptaryn saqtaýǵa jáne megapolıs turǵyndarynyń vaktsınalaný qarqynyna tikeleı baılanysty.
Almatynyń bas sanıtarlyq dárigeri dert juqtyrǵandar sanynyń kúrt ósýine baılanysty 30 maýsymda kezekti zertteýlerdiń nátıjesi alynǵanyn aıtty.
«46 synamanyń 36-da «Delta» shtamy, 8-de «Alfa» shtamy jáne ekeýinde – ashylmaǵan mýtatsııa anyqtaldy. Zertteý nátıjesine sáıkes delta shtamynyń úles salmaǵy 78 paıyzdy quraıdy», – dedi Sanıtarlyq-epıdemıologııalyq baqylaý departamentiniń basshysy.
Jandarbek Bekshın qala turǵyndary men qonaqtaryn halyq kóp jınalatyn oryndarǵa barmaýǵa, áleýmettik qashyqtyq pen betperde rejımin saqtaýǵa shaqyrdy.
Almatynyń bas sanıtarlyq dárigeri koronavırýstyń jańa shtamynyń tez taralatynyn aıtyp, qala turǵyndaryna vaktsına alý kerektigin eske saldy.
