Almatyda «delta» shtamynyń taralýy densaýlyq saqtaý júıesiniń júktemesin eki ese arttyrdy
ALMATY. QazAqparat - Almaty qalasynyń juqpaly aýrýlar aýrýhanalarynda 6 myńnan astam naýqas jatyr, onyń ishinde 169 bala bar. Bul týraly Óńirlik kommýnıkatsııalar qyzmetiniń baspasóz máslıhaty barysynda qoǵamdyq densaýlyq basqarmasy basshysynyń orynbasary Svetlana Sultanǵazıeva málim etti, dep habarlaıdy QazAqparat tilshisi.
Ótken táýlikte Almatyda 1590 adamnan koronavırýs anyqtaldy. Onyń 1515-si sımptomdy. 6,021 naýqas aýrýhanada jatyr. 476 adam reanımatsııada emdelýde, al 35 adam ÓJJ apparatyna, 188 ınvazıvti ÓJJ apparatyna, 223 naýqas High Flow apparatyna qosylǵan.
Qaladaǵy kovıdtik statsıonarlarda tósek-oryn tapshylyǵy joq. Búgingi kúnge deıin barlyǵy 8 910 tósek-oryn daıyndaldy.
Svetlana Sultanǵazıeva Almatynyń dárigerleri eki ese júktememen jumys isteıtinin atap ótti.
«Jedel járdem kóliginiń júktemesi sharyqtap tur, táýligine 1600-ge jýyq jaǵdaı tirkelip, aýrýhanaǵa jatqyzý sany 700-750 deńgeıde, ósim joǵary. Táýligine 3000-3500 deıin qońyraý soǵylady», - dedi dáriger.
Ol 12 868 naýqas telemedıtsına ortalyǵynyń mobıldi toptarynyń baqylaýynda ekenin aıtty.
«Búginde júzdegen dáriger koronavırýspen kúresýde, olardyń keıbireýleri Almatydaǵy vaktsınatsııalaý ortalyqtarynda jumys isteıdi. 1000-nan astam dáriger azamattarǵa ekpe jasaıdy. «Delta» shtamynyń taralýy densaýlyq saqtaý júıesiniń júktemesin eki ese arttyrdy»,- deıdi spıker.
Svetlana Sultanǵazıeva almatylyqtardy kúzgi-qysqy maýsymdyq vırýstar kezeńi jaqyndaǵandyqtan jaqyn arada vaktsınalanýǵa shaqyrdy.
«Endi JRVI jáne tumaý sııaqty maýsymdyq aýrýlar bastalady. Sondyqtan koronavırýsqa qarsy vaktsınalaný qajet», - dedi densaýlyq saqtaý basqarmasynyń ókili.
