Almatyda daýys berýshiler sany ótken naýqandarǵa qaraǵanda kóp bolady - B. Dospanov
ALMATY. QazAqparat- Almaty qalasynyń aýmaqtyq saılaý komıssııasynyń tóraǵasy Baqytjan Dospanov erteń - 26 sáýir kúni bolatyn kezekten tys Prezıdent saılaýyna Almaty qalasynyń daıyn ekendigin málimdedi.
Ol óz sózinde aldymen Almaty qalasynda kezekten tys Prezıdent saılaýyn uıymdastyrý qurylymymen tanystyrdy.
Qalalyq saılaý komıssııasynyń qaramaǵynda segiz aýdandyq saılaý komıssııasy bar. Al olarda 513 saılaý ýchaskeleri uıymdastyrylǵan. Bıylǵy naýqannyń jumystaryna 3600-den astam adam jumyldyrylypty. Árbir saılaý komıssııasy jeti adamnan turady. Olardyń arasynda ár túrli partııalar men qoǵamdyq uıymdardyń ókilderi bar. Qazirgi tańda Almatyǵa kelgen sheteldik baqylaýshylardyń sany 80-nen asty. Olardyń ishinde Eýroodaq, Azııa jáne TMD elderinen, sondaı-aq AQSh-tan kelgen mamandar bar. EQYU ókilderi de saılaý naýqanyna baqylaý júrgizetin bolady.
Sonymen qatar, Baqytjan Dospanov saılaýshylardyń saılaýǵa kelý deńgeıiniń qandaı bolatyndyǵyna da toqtalyp ótti.
«Ótken naýqandarda saılaýshylardyń kelý deńgeıi aýdandarda 70 paıyzdy qurady. Bıyl da budan kem bolmaıdy. Sol, 65-70 paıyz bolatyn shyǵar dep oılaımyn. Almaty úshin bul ájepteýir joǵary kórsetkish. Tipti batys elderinde ortasha statıstıkalyq málimetter boıynsha saılaýshylardyń kelý deńgeıi kóp jaǵdaıda 30-50 paıyzdy quraıdy. Soǵan qaramastan ol jaqta mundaı saılaý jaramdy dep sanalady» - dedi ol.
Budan basqa, Almaty qalasynyń aýmaqtyq saılaý komıssııasynyń tóraǵasy qalalyq Іshki Іster departamenti saılaýdyń qaýipsizdik jaǵyn tolyǵymen qamtamasyz etetindigin jetkizdi.
«Keshe polıtsııa qyzmetkerlerimen birge barlyq bıýlletenderdi ýchaskelerge taratyp shyqtyq. Bıyl kezekten tys Prezıdent saılaýynda daýys berýshiler sany ótken saılaýlarǵa qaraǵanda kóp bolaıyn dep otyr. Barlyǵy - 1 mln. 28 myń adam. Ótken saılaýda resmı málimetter boıynsha 954 myń adam daýys bergen bolatyn. Erteń daýys berý keshki saǵat 20:00-de deıin jalǵasady» - dedi B. Dospanov.
Budan basqa Baqytjan Dospanov saılaý ótkizý týraly habar taratylǵan kúnen bastap kúni búginge deıin qyrýar jumystar atqarylǵandyǵyn aıtty. Mysaly saılaý ýchaskelerine mekenjaılar ázirlengen. Úmitkerlerge efır ýaqyty belgilendi. Úgit-nasıhat materıaldary daıyndalyp, taratyldy. Bılbordtar ázirlendi.
«Kandıdattarǵa teń jaǵdaı jasalǵanyn da aıta ketken jón. Jáne eń bastysy, barlyq saılaýshylardyń úıine shaqyrý bıletteri taratyldy. Onda saılaýdy ótkizý ýaqyty men saılaý ýchaskeleriniń mekenjaılary jazylǵan. Bul óziniń oń nátıjesin beredi degen úmittemin» - dedi ol.
