Almatyda Dáýlet Turlyhanovtyń júldesine arnalǵan grek-rım kúresinen týrnır ótedi
ALMATY. QazAqparat 1-2 sáýir kúnderi Almatydaǵy «Dostyq» sport kesheninde 2000-2002 jyly týylǵan jasóspirimder arasynda grek-rım kúresinen qoǵam qaıratkeri Dáýlet Bolatuly Turlyhanovtyń júldelerine arnalǵan dástúrli XVIII týrnıri ótedi, dep habarlaıdy QazAqparat tilshisi Almaty qalasy Dene shynyqtyrý jáne sport basqarmasynyń baspasóz qyzmetine silteme jasaı otyryp.
Bul týrnırge sportshylar Qazaqstannyń barlyq aımaqtarynan, sondaı-aq, Almaty men Astana qalalarynan qatysady. Atap aıtqanda, Dáýlet Turlyhanovtyń, Jaqsylyq Úshkempirovtiń, Bolat Turlyhanovtyń, Haıs Aqqalıevtyń sport mektepteri men «Jas Kyran» memlekettik mekemesi, Qazaly aýdanynyń BJSM, «Dáýlet-Járkent» PSK (Almaty oblysy) jáne ózge sport uıymdary ózara myqtyny anyqtaıdy.
Respýblıkalyq týrnırde palýandar on salmaq dárejesinde beldesedi. Sport sharasyna respýblıkalyq kúres federatsııasynyń vıtse-prezıdenti Dáýlet Turlyhanov, eki dúrkin álem chempıony, úsh dúrkin Eýropa jeńimpazy, Olımpıada chempıony, belarýs Kamandar Májıtov, Almaty qalasy Dene shynyqtyrý jáne sport basqarmasynyń basshysy Ábil Dóńbaev, Olımpıada jáne álem chempıony, Qazaq KSR eńbek sińirgen jattyqtyrýshysy Jaqsylyq Úshkempirov syndy qonaqtar qatysady.
Jarys (UWW) erejeleri boıynsha ótedi. Jeńimpazdar men júldegerlerge medal men dıplom, sondaı-aq baǵaly syılyqtar tabystalady.
