Almatyda Dáýlet Turlyhanovtyń júldesi úshin grek-rım kúresinen jasóspirimder arasyndaǵy respýblıkalyq týrnır ótedi
ASTANA. 3 sáýir. QazAqparat - 6-7 sáýir kúnderi Almatyda KSRO eńbek sińirgen sport sheberi, Qazaqstan Respýblıkasyna eńbek sińirgen jattyqtyrýshy Dáýlet Turlyhanovtyń júldesi úshin grek-rım kúresinen 1996-1998 jyly týylǵan jasóspirimder arasyndaǵy Respýblıkalyq týrnır ótedi.
Bul týraly QR kúres federatsııasynyń baspsóz qyzmeti habarlady.
Bıyl atalmysh jarys osymen 14-ret ótkeli tur jáne onyń basty ereksheligi - Ashyq dep atalýynda. Demek, elimizdiń barlyq óńirleri men sport mektepterinen bólek týrnırge ózge elderdiń balýandary da at basyn burmaq. Búgingi kúnge jarysqa qatysýlaryn naqtylaǵan Belarýs, Ózbekstan jáne Qyrǵyzstan komandalary. Oǵan qosa jyl saıyn bizdiń bapkerler úshin bul birinshilik Azııa jáne álem chempıonaty sııaqty mańyzdy jarystarǵa quramdy anyqtaıdy.
Balǵyn balýandar 42 kg, 46 kg, 50 kg, 54 kg, 58 kg, 63 kg, 69 kg, 76 kg, 85 kg jáne 100 kg salmaq dárejeleri boıynsha kúsh baıqasady. Qalyptasqan dástúr boıynsha osy demalysta kúres zalynda dańqty palýanymyz Dáýlet Bolatulynyń toıyna belgili balýandar, sport ardagerleri jáne basqa da qurmetti qonaqtar bas qosady.
Jyl saıyn Dáýlet Turlyhanovtyń júldesi úshin ótkiziletin týrnır úzdik balýandardy anyqtap, keıin dál sol sportshylar óz joldaryn taýyp, úlken jetistikterge qol jetkizip jatady. Jeńis tuǵyryna qazirgi ulttyq quramanyń balýandarynyń birazy kóterilgen. Olardyń arasynda: álem chempıonatynyń kúmis jáne qola júldegeri, Azııa chempıony Almat Kebisbaev, álem chempıonatynyń eki dúrkin qola júldegeri, Azııa Oıyndarynyń jeńimpazy Nurmahan Tinálıev jáne taǵy basqalary bar.
Byltyrǵy jarysta bas júldeni qanjyǵalaryna baılaǵandar: Fıdahmetov Ernar (ShQO), Meden Arslan ("Dáýlet" SM), Nurym Tóre (Almaty obl), Qýandyq Mırat (SQO), Fateev Vıacheslav (Pavlodar obl), Shaharbek Rahman (Almaty obl), Akıev Hýseın (Qaraǵandy obl), Mýtsolgov Hýseın (Qaraǵandy obl), Espenbetov Baqdáýlet (OQO), Birjanov Aıan (Qostanaı obl).
Dáýlet Turlyhanov - álem chempıony (1989), álem chempıonatynyń kúmis júldegeri (1993), Eýropa chempıony (1987), Azııa chempıony (1995), Olımpıada Oıyndarynyń kúmis (1988) jáne qola (1992) júldegeri, KSRO jeti dúrkin chempıony, álem Kýbogynyń eki dúrkin ıegeri, KSRO halyqtar Spartakıadasynyń jeńimpazy (1991), HІІ Azııa Oıyndarynyń jeńimpazy (1994). Pedagogıka ǵylymdarynyń kandıdaty, qaýipsizdik, qorǵanys jáne tártip máseleleri Akademııasynyń akademıgi, Qazaqstan kúres federatsııasynyń qurmetti prezıdenti jáne FILA Bıýrosynyń múshesi.
