Almatyda dástúrli V jańajyldyq marafony ótti
ALMATY. QazAqparat - Baým toǵaıynda «Ekstremaldy atletıka» atty besinshi jańajyldyq Almaty marafony ótti, dep habarlaıdy QazAqparat qala ákimdiginiń baspasóz qyzmetine silteme jasap.
Jańa jyldyń alǵashqy kúninde startqa 1,5 myńǵa jýyq adam shyqty. Dástúr boıynsha qatysýshylardyń kóbi karnavaldyq kostıýmderin kıdi.
Marafonnyń bas hatshysy Vadım Vınokýrovtyń aıtýynsha, skandınavııalyq jaıaý júrýge 3 qashyqtyq berildi — 21, 42 jáne 7 shaqyrym.
Jarysqa qatysqan barlyq adamǵa medal berildi. Sonymen qatar, marafonǵa trekıng júıesine qosylý arqyly Qazaqstannyń jáne álemniń kez-kelgen basqa qalasynan qatysýǵa múmkindik boldy.
«Marafon 2015 jyldan bastap ótkizilip keledi. Bıyl júgirýge 1,5 myń adam qatysty. 400-ge jýyq adam álemniń túkpir-túkpirinde júgirdi. Bizdiń uranymyz: maǵynasyz kúndi maǵynamen toltyrý. Basty maqsat – halyq arasynda dene shynyqtyrý, sport jáne salaýatty ómir saltyn nasıhattaý», — dedi V. Vınokýrov.
