Almatyda dástúrli tamyz pedagogıkalyq keńesinde bilim sapasyn arttyrý máseleleri qaralýda
ALMATY. QazAqparat - Búgin Almatyda Abaı atyndaǵy Qazaq memlekettik akademııalyq opera jáne balet teatrynda dástúrli qalalyq orta bilim berý qyzmetekerleriniń «Bilimdi el - Máńgilik el» taqyrybynda tamyz pedagogıkalyq keńesi bastaldy.
Onyń jumysyna QR Bilim jáne ǵylym mınıstri Erlan Saǵadıev, Almaty qalasynyń ákimi Baýyrjan Baıbek, sondaı-aq, qalalyq máslıhattyń depýtattary, QR BǴM ókilderi, ardager pedagogtar, jalpy bilim berý mekemeleriniń basshylary men pedagogtary jáne úkimettik emes uıymdardyń ókilderi qatysýda.
Óziniń baıandamasynda Almaty qalasy Bilim basqarmasynyń basshysy Rahat Shımasheva qalada bilim sapasyn jetildirý úshin barlyq qajetti sharalardyń jasalyp jatqandyǵyn atap ótti. Qalada jańa zamanaýı mektepter salynyp, bilim berý mekemeleriniń materıaldyq-tehnıkalyq bazasy nyǵaıtylýda.
«Almaty qalasynda damyǵan jalpy bilim beretin júıe júzege asyrylady. 244 orta bilim berý mektebi jumys isteıdi. Olarda 210 myńnan astam oqýshy bilim alady. Sońǵy jyldary mektepterde oqýshylardyń sany kúrt ósýde. Tek ótken jyldyń ózinde ósim - 10 myń adamnan asty. Bul jerde qazaq tildi mektepterde bilim alatyn oqýshylardyń sanynyń artyp jatqandyǵyn atap ótken jón. Eger, 2015 jyly memlekettik tilde bilim alatyn oqýshylardyń sany - 90 myń adamdy qurasa, 2016 jyly olardyń sany - 96 myń adamǵa jetti. Bıyl qazaq tilinde bilim beretin jańa fızıka-matematıka mektebi paıdalanýǵa beriledi. Onda jańartylǵan bilim berý baǵdarlamasy, sondaı-aq, halyqaralyq ınnovatsııalyq tehnologııalar engiziletin bolady», - dedi R. Shımasheva.
Keńes barysynda ótken oqý jylynyń qorytyndysy shyǵarylyp, bilim berý mekemeleriniń aldaǵy 2016-2017 oqý jylyna daıarlyǵy, bilim sapasyn arttyrý máseleleri talqylandy.
