Almatyda dástúrli "Shákárim oqýlary" ótip jatyr
ALMATY. Qarashanyń 4-i. QazAqparat /Erlik Erjanuly/ - Shákárim murasy jastardyń kózqarasymen qalaı tanylyp jatyr. Bul saýalǵa búgin Almatyda "Shákárim muralaryna jańa býyn kózqarasy" degen taqyryppen ótip jatqan dástúrli "Shákárim oqýlary" jaýap izdeýde ,
dep habarlaıdy QazAqparat.
"Almaty qalasynyń Tilderdi damytý basqarmasynda til máselesin damytýmen ǵana emes jalpy halyqtyń rýhyn oıatý, uly tulǵalardy taný, nasıhattaý baǵytynda kóptegen sharalar atqarylyp kele jatyr. Shákárim oqýlaryn biz eń aldymen jastarǵa baǵyshtap otyrmyz. Biz jastar kitap oqı ma, jastar uly tulǵalarymyzdy tanı ma degen saýaldarǵa áli tolyq jaýap taba almaı kele jatyrmyz. Sondyqtan bul sharada Shákárim murasy jastardyń kózqarasymen qalaı tanylyp jatyr degenge kóbirek mán berdik. Maqsat - Shákárim Qudaıberdiulynyń adamı qundylyqtardy nasıhattaý men ult tutastyǵyn nyǵaıtý jolynda qaldyrǵan shyǵarmalaryn jastardyń zerttep zerdeleý dástúrin jalǵastyrý", deıdi basqarma bastyǵy Kenjehan Matyjanov.
Onda qazir túrli oqý oryndarynan jınalǵan ǵylymnyń ártúrli salasynda bilim alyp, eńbek etip júrgen jas ǵalymdar óz mamandyqtary boıynsha baıandamalar jasaýda. Shara barysynda endi Sh. Qudaıberdiuly shyǵarmalaryn zerttep, jańa qyrynan nasıhattaýǵa úles qosqan shákárimtanýshylar qalalyq tilderdi damytý basqarmasynyń arnaıy dıplomymen marapattalady. Sondaı-aq "Adamdyq boryshyń..." degen atpen Shákárim muralaryn jatqa aıtýshylar baıqaýy ótip jatyr.
