Almatyda dástúrli "Saǵyndyrǵan ánder-aı" keshi ótti
ALMATY. Jeltoqsannyń 25-i. QazAqparat /Erlik Erjanuly/ - "Saǵyndyrǵan ánder-aı" jastarymyzdyń búgin aıtyp erteń umtylatyn, sózi arzanqol jazylǵan nemese áýeni kóńilge qonbaıtyn ánderin azaıtýǵa óz yqpalyn tıgizedi. Ony joba avtory jáne keshtiń uıymdastyrýshysy, ánshi Maıra Іlııasova keshe Almatyda 3-shi ret ótken "Saǵyndyrǵan ánder-aı" keshinde aıtty,
dep habarlaıdy QazAqparat.
"Jylyna eki ret ótkizemiz dep kórermenderge ýáde bergenbiz. Bul kontsert qazir kórermen kóńilinen shyqqan juldyzdy keshke aınaldy desem artyq emes. Qazir búgin aıtyp erteń umtylatyn, sózi arzanqol jazylǵan nemese áýeni kóńilge qonbaıtyn ánder kóbeıip ketti. Biz jastar olardyń ornyna retro ánderdi kóbirek aıtsa jáne sózin, áýenin buzbaı durys aıtsa degen maqsatpen Nurǵalı Núsipjanov, Eskendir Hasanǵalıev, Maqpal Júnisova, Roza Rymbaeva sııaqty aǵa býyn ókilderimen birigip aıtqyzamyz. Bul keshke 80-nen astam ánshi qatysyp, 40-taı ándi oryndady", deıdi Qazaqstannyń eńbek sińirgen artısi, "Maıra" prodıýserlik ortalyǵynyń jetekshisi, ánshi Maıra Іlııasova. Azamat Satybaldy men Aınur Bólebaı jáne Aıgúl Imanbaeva men Juldyzbek Jumabaı júrgizgen bul keshtiń stsenarııin jazǵan Janar Shámel. Almaty qalasy ákimdigi men "Qazaqstan" teleradıokorporatsııasynyń qoldaýymen ótken "Saǵyndyrǵan ánder-aı" buǵan deıin Almatyda 2 ret, al Astanada bir ret ótken bolatyn. Onda qalyptasqan dástúr boıynsha bul joly "Jańa esim" aıdary boıynsha Qaraǵandy, Pavlodar, Atyraý, Oral jáne Qyzylorda qalalarynan kelgen birneshe jas ánshiniń úlken sahnadaǵy tusaýy kesildi. Máselen, Qanat Máýlen Nurjan Qaljanmen birigip "Daıdıdaý", al Medethan Qaramyrza, Saıat Ábdiǵalı, Erkin Ótegenov pen Nursaıat Dáýlethanovtar "Óziń sáýlem izdegenim" ánin oryndap, kórermen iltıpatyna bólendi.
