Almatyda dástúrli «Mýzeı túni» ótedi
ALMATY. 11 mamyr. QazAqparat - Almatydaǵy QR Memlekettik ortalyq murajaıy 18 mamyr kúni jetinshi ret «Mýzeı túnin» ótkizbek.
Halyqaralyq mýzeıler kúni aıasynda júzege asatyn sharaǵa bul joly kelýshiler sany ádettegiden kóbirek bolady dep boljanýda. Sharany uıymdastyrýshylar búgin arnaıy uıymdastyrǵan baspasóz máslıhatynda málimdedi.
«Bıyl ol «Ózgerister álemindegi mýzeıler.Jańa shaqyrýlar men shabyttyń qaınar kózderi» degen uranmen ótpek. 2006 jyldan beri dástúrli túrde uıymdastyrylatyn «Mýzeı túnin» qarsy alýǵa jyl saıyn 6 myń adam qatysady. Bıyl olardyń sany budan da kóp bolmaq», - deıdi QR Memlekettik ortalyq murajaıy dırektorynyń birinshi orynbasary Beıbitqalı Qaqabaev.
Onyń aıtýynsha, 1997 jyly Germanııa mýzeıleri alǵash ret túnde kelýshilerge óz esigin ashqan bolatyn. Keıin bul bastama álemniń ózge elderinde jalǵasyn tapty.
Beıbitqalı Smaǵululy: «Ókinishke oraı ol Qazaqstanda tek QR Ortalyq mýzeıinde ǵana ótkizilýde. Ózge elderde qalalyq ákimshilik bul shara kezinde arnaıy qoǵamdyq kólikter bólip, oǵan qatysýshylardyń ártúrli mýzeılerde bolyp, ondaǵy jádigerlermen tanysýyna jaǵdaı jasaıdy. Bizdiń usynysymyzǵa ázirge ózge mýzeılerdegi áriptesterimiz ben qalalyq ákimshilik tarapynan eshqandaı qoldaý jasalmaýda», - deıdi.
Onyń sózine qaraǵanda, «Mýzeı túni» qala turǵyndary men qonaqtary 17:00 men 24:00 aralyǵynda HІH-HH ǵasyrlardaǵy orden-medaldar men belgiler jıyntyǵynyń «Marapattalady...» jáne «Qazaqstannyń janýarlar álemi», «Uly Otan soǵysynyń qarý-jaraqtary» kórmelerin tamashalaıdy. Al árbir 300-shi adam «Qazaqstannyń arheologııalyq altyny», «Antropologııa mýzeıi», «N.G. Hlýdev zaly» syndy biregeı óner zaldarynda ekskýrsııa jasaýǵa múmkindik alady. Sondaı-aq óner sheberleriniń kontsertteri, «Qazaqfılm» kınostýdııasynyń jańa týyndylary, ulttyq kıimder men shash úlgileri defılesi usynylyp, sándik qolóner buıymdarynyń kórme-jármeńkesi de uıymdastyrylady.
