Almatyda dástúrli «Medeý-marafony» uıymdastyrylady
ALMATY. 26 mamyr. QazAqparat /Názıra Eleýhan/ - 28 mamyrda Almatyda dástúrli 14-shi «Medeý-marafony» ótedi.
Atalmysh shara tańǵy saǵat 8.00-de bastalady. Marafon Ál-Farabı jáne Dostyq dańǵyldarynan bastaý alyp, «Medeý» bıik taýdaǵy muz aıdynyna deıin jalǵasady, jarysqa qatysýshylar ol jerden júgirýdi Ál- Farabı dańǵylyndaǵy QR Tuńǵysh Prezıdenti atyndaǵy saıabaqta aıaqtaıtyn bolady. Marafon joly 42 shaqyrym 195 metrdi quraıdy. Sporttyq sharaǵa jasy 18-ge tolǵan, qoldarynda dárigerlik anyqtamalary bar jastar, kez-kelgen uıym músheleri, nıet bildirýshi sportsúıer qaýym qatysa alady.
Qatysýǵa tilek bildirýshiler óz ótinishterin Abaı dańǵyly, 48-degi Ortalyq stadıonda ornalasqan Almaty marafon klýbyna ákelip, tapsyrýlaryna bolady.
Medeý marafonynyń tarıhy 1998 jyldan bastalady. Onyń uıymdastyrýshysy - uzaq jyl Almatyda turǵan nemis kásipkeri Iorg-Ýlrıh Knobloh. Alǵashynda shaǵyn ǵana shara retinde atalyp ótip júrgen báseke sońǵy kezderi qanatyn keńge jaıdy. I. Knobloh Germanııaǵa ketkeli beri Almaty qalalyq ákimdiginiń qoldaýymen uıymdastyrylyp júr.
