Almatyda dástúrli ıslamǵa qatysty tarıhı-tanymdyq kitap shyqty
ALMATY. QazAqparat - Almatyda «Dástúrli ISLAM jaýharlary» atty tarıhı-tanymdyq kitaptyń tusaýy kesildi.
Jańa basylym Qazaqstan musylmandary dinı basqarmasynyń bastamasymen «Din jáne tarıh taǵylymy» jyly aıasynda jaqynda jaryqqa shyqqan.
Búgin QR Ulttyq kitaphanasy ǵımaratynda ótken dóńgelek ústel barysynda elimizdegi qazirgi dinı ahýal, «Din jáne tarıh taǵylymy» jylynda atqarylatyn is-sharalar baıandaldy.
«Byltyrǵy «Din men dástúr» jylynda biraz sharalar atqaryldy. Buryn meshit pen halyq arasynda baılanys bolǵan joq. Meshit óz aldyna, halyq óz aldyna ómir súrip jatty. Egemendik alǵannan keıin «terezeni ashsań taza aýamen birge shań-tozań kiredi» degendeı, teris aǵymdar kirip ketti. Qarsy turatyn din mamandary az boldy. Jastarymyz óse kele dástúrge qarsy shyǵa bastady. «Dombyrany, betashardy, sálemdi haram» dedi. Osy turǵyda byltyr din men dástúrdi jaqyndatý úshin birshama is atqaryldy. Endi bıylǵy jyldy QMDB «Din jáne tarıh taǵlymy» jyly dep jarııalanǵan bolatyn. Bul jyl aıasynda úlken konferentsııalar men sharalar ótetin bolady. Solardyń alǵashqysy bolyp búgin mine «Dástúrli ISLAM jaýharlary» atty tarıhı-tanymdyq kitaptyń tusaýyn kesip jatyrmyz. Óte qundy eńbek. Óskeleń urpaqqa úlken ǵıbrat bererine senimdimiz», - dedi bas múftı Erjan qajy Malǵajyuly.
Aıta ketý kerek, 3 myń danamen shyqqan kitapta X-XVII ǵǵ. aralyǵyndaǵy Qarahandyqtar, Altyn Orda jáne Qazaq handyǵy dáýirlerinde jazylǵan dinı-tanymdyq, dinı-sopylyq, dinı-kanondyq jáne dinı-ǵıbrattyq týyndylardyń ozyq úlgileri jınaqtalǵan.
