Almatyda dástúrli ІІ qaıyrymdylyq baly ótti
ALMATY. 22 qarasha. QazAqparat /Názıra Eleýhan/ - Qaıyrymdylyq baly - bul shynaıy mýzyka men klassıkalyq bıdi baǵalaıtyn adamdardyń basyn qosatyn, eń bastysy - janashyrlyq, jaqsy isterge nıet, metsenattyq jáne qaıyrymdylyqty ómiriniń basty qaǵıdasy dep sanaıtyn adamdar úshin mereke.
Bul týraly qaıyrymdylyq baldyń Qurmetti komıtetiniń tóraǵasy Nurtaı Ábiqaev senbi kúni Almatyda baldyń ashylý saltanatynda aıtty. "Sharany ótkizýden túsken tabystyń bir bóligi Qazaqstandaǵy ıÝNISEF baǵdarlamalaryn qoldaýǵa baǵyttalatyn bolady. Naqtyraq aıtqanda, biz múmkindikteri shekteýli balalarǵa kómektese alamyz", - dep atap ótti Nurtaı Ábiqaev.
Almaty qalasynyń ákimi Ahmetjan Esimov baldyń basqa qalada emes, Almatyda osymen ekinshi ret ótkizilýi jaqsy dástúrge aınaldy jáne ol qalamyzdyń iri qoǵamdyq mańyzy bar oqıǵasyna aınaldy, dep atap ótti. "Bul keremet joba tek qana joǵary mádenıettilikke bastap qoımaıdy, sonymen qatar, múmkindigi shekteýli balalardy qoldaýǵa baǵyttalǵan qaıyrymdylyqqa shaqyrady. Bizder, eresek adamdar úshin bala - ómirdiń basty máni men baılyǵy emes pe!? Álemde balanyń qýanyshy men kúlkisine jetetin qymbat nárse joq", -dedi qala basshysy.
Qazaqstandaǵy ıÝNISEF balalar qorynyń ókili Hanaa Sıngerdiń aıtýynsha, baldyń ereksheligi men biregeıligi - sharadan túsken qarajattyń bir bóliginiń ıÝNISEF baǵdarlamalaryn qoldaýǵa baǵyttalatyndyǵy, ıaǵnı ata-ana qamqorynsyz qalǵandarǵa, múmkindigi shekteýli balalarǵa, ár túrli zorlyq-zombylyq kórgenderge úlken kómek kórsetiletindigi. "Qazaq halqy bala dúnıege kelgennen bastap, óz balalaryn qamqoryna alyp, álpeshtegen, jaqsy qaraǵan. Buryndary eshqashan tastandy balalar bolmaǵan. Bul dástúrlerdiń tamyry aǵaıyndyq, týystyq pen januıalyq baılanystardyń berik negizinde jatyr. Bir de bir bala tastandy bolyp óspes úshin, biz bul dástúrdi jańǵyrtýymyz kerek. Bul rette korporatıvtik sektor jas urpaqtyń áleýmettik jaýapkershiligi men yqpaldastyǵyn artyrý da sheshýshi ról atqarady",-dedi H. Sınger.
Bal dástúrli túrde debıýtanttardyń saltanatty polonez bıimen ashyldy. Frantsııadan arnaıy kelgen, baldyń bas baletmeısteri Gedemınas Tarandanyń bul qoıylymy qonaqtar kóńilinen shyqty. Memlekettik sımfonııalyq orkestrdi basqarǵan Marıýs Stravınskıı men Vag Papıannyń mýzykalary keshtiń ajaryn ashyp, tyńdarmandardyń kóńilin baýrady. Keshte ıtalııandyq tenor Alessandro Safına men elimizdiń halyq ártisi Nurjamal Úsenbaeva, sonymen qatar Elvıra men Álfııa Naqıpbekovalar, «Touch & Go» pop-djaz-ujymy men «The Apples» toby óner kórsetti.
