Almatyda dástúrli «Baspaldaq-2010» básekesi uıymdastyryldy
ALMATY. Qazannyń 4-i. QazAqparat /Erbol Turymbetov/ - Keshe Almatyda «Medeý» shatqalynda 7-shi qysqy Azııa oıyndaryn ótkizý qurmetine oraı Raıymbek batyrdy eske alýǵa arnalǵan dástúrli XXII «Baspaldaq-2010» baspaldaqqa órlep júgirý jarysy ótti.
Bıylǵy básekeni Almaty qalasy ákimdigi, Týrızm, deneshynyqtyrý jáne sport basqarmasy, Halyqtyq-ulttyq sport túrleri jáne buqaralyq saýyqtyrý deneshynyqtyrý klýby, Medeý aýdany ákiminiń apparaty men «Vechernıı Almaty» gazetiniń redaktsııasy birlese uıymdastyrdy.
«Baspaldaq-2010» jarysynda sporttyń 20 túrinen saıys ótkizildi. Jarysqa qatysýshylar «Arqan tartý», «Qol kúresi», «Kir tasy sporty», «Saǵat», «Aýyrlyq kóterý», «Sheńberdi aınaldyrý», «Sekirgish», «Eki tentek», «Batyr», «Robın Gýd», «Asyq mergen», «Saýsaq kúres», «Belbeý kúresi», «Kúlki boksy», «Keýdeni jerden kóterý» jáne taǵy basqa da oıyn túrleri boıynsha synǵa tústi.
Básekege qatysýshylardyń jas erekshelikterine shekteý qoıylmady. Týrnırdiń eń jas qatysýshylary 5 jasar Anjela Garıfova men 6 jastaǵy Rasýl Ilııas boldy. Al eń úlken qatysýshylary retinde 82-ge kelgen Fedor Shýlkov pen odan bir jas kishi Saıat Jansúirovter tanyldy. Áıelder arasynda 82 jasqa kelgen Nına Vdovına jarys jolyna shyǵyp, kópshiliktiń yqylasyna bólendi.
Sonymen qatar, jarysqa birshama baspasóz ókilderi de qatysty. Al sheteldik qonaqtar Tájikstannan kelgen Behrýz Nasredınova, Ekaterına Kım, Qyrǵyzstandyq Marat Myrzabekov, Aıjamal Qýbanychbekova, Elıza Kenenbaeva, nemis azamattary Andres Lange, Sebastıan Froıdenberg, Bettına Rýınster týrnırdi tartysty ótkizdi.
841 baspaldaqqa júgirýde erler arasynda eń úzdik jyldamdyq kórsetken elimizge tanymal bıatlonshy Dıas Keneshov boldy. Al áıelder arasyndaǵy básekede Polına Repına 6.17 sekýnd kórsetkishimen oza shyqty. Jeńimpazdar baǵaly syılyqtarmen marapattaldy. Sonymen birge, saıystyń ózge de túrlerinen jeńiske jetkenderge maqtaý qaǵazdary men baǵaly syılyqtar tabys etildi.
