Almatyda dástúrli balmuzdaq festıvali ótedi

ALMATY. QazAqparat - Almatynyń Ortalyq mádenıet jáne demalys saıabaǵynda jazdyń tátti merekesi - «BalmuzDay». Shyǵys ertegisi»  festıvali ótedi, dep habarlaıdy QazAqparat tilshisi.

Bıyl festıval eki kún toılanady. Almatydaǵy Ortalyq mádenıet jáne demalys saıabaǵynyń sahnasynda qonaqtardy ǵalamat shoý kútedi.

«14-15 shildede Almatydaǵy Ortalyq mádenıet jáne demalys saıabaǵy Shyǵystyń ertegideı atmosferasyna enedi. Demalys alańy táttige toly shyǵys bazaryna aınalyp, oıyn-saýyqtyń ortasy bolady. 2 kún ishinde almatylyqtar men qala turǵyndary balmuzdaqtyń túr-túrinen: ystyq balmuzdaq, bıo-balmuzdaq, azot-balmuzdaǵy, qymyzdan jasalǵan balmuzdaqtan jáne túrli táttilerden dám tata alady»,-deıdi uıymdastyrýshylar.

Festıvaldiń alǵashqy kúni qonaqtar mýzyka men teatrlandyrylǵan qoıylymdarǵa kýá bolady. Sharanyń ár qatysýshysy baǵaly syılyqtar utysy men fleshmobqa qatysa alady.

«Ekinshi kúni mýzykalyq konkýrs - «BalmuzDay Daýysy-2018» karaokesi uıymdastyrylady. Baıqaýǵa 3-ten 16 jasqa deıingi balalar qatysa alady. Jeńimpazdar Grýzııadaǵy talanttar baıqaýyna joldama alady. Qatysýshylardyń vokaldyq múmkindigin juldyzdy qazylar alqasy baǵalaıdy», - deıdi uıymdastyrýshylar.

Aıta ketý kerek, dástúr boıynsha festıvalge balalar úıiniń tárbıelenýshileri shaqyrylady. Olar qundy syılyqtarǵa ıe bolyp, attraktsıondarda tegin oınaı alady.