Almatyda Dárkembaı Shoqparuly týraly derekti fılmniń tusaýkeseri ótti
ALMATY. QazAqparat -Almaty QR Ulttyq kitaphanasynda, Ermek Tursynovtyń kınoklýbynda QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirgen «Usta» atty derekti fılmniń tusaýkeseri ótti, dep habarlaıdy QazAqparat tilshisi.
Derekti fılm belgili qolóner sheberi, Qazaqstan jáne KSRO sýretshileri jáne dızaınerler odaǵynyń múshesi, Qazaqstannyń eńbek sińirgen qaıratkeri, ustaz, etnodızaıner Dárkembaı Shoqparulynyń ómiri men shyǵarmashylyǵy týraly baıandaıdy. Fılmniń rejısseri Mirǵalym Esirkepov.
Mádenı is-sharaǵa Dárkembaı Shoqparulynyń týystary men jaqyndary, kózkórgen zamandastary men shákirtteri, fılmniń túsirý toby men «Qazaqfılm» kınostýdııasynyń ókilderi qatysty.
«Men Dárkembaı Shoqparulynyń tulǵalyq beınesin tereńinen tanyǵym keldi. Sondyqtan da osy fılmdi túsiremin dep sheshtim. Ol kisini zertteı kele, ol - aldyna qoıǵan maqsatyna jetýden taımaıtyn, batyl ári aqjarqyn adam ekenin bildim. Onyń óz aldyna qoıǵan bar maqsaty - óz sheberligin ıgerip, ony damytý ǵana emes, sonymen qatar, ulttyq dástúrdi saqtap, ony shákirterine, izbasar ustalarǵa úıretý edi. Keńes zamanynan beri sándik-qoldanbaly ónerine tıesili kóńil bólinbeıdi, beıneleý óneriniń jas salasy retinde ǵana qarastyrylady. Meniń birinshi mamandyǵym - qoldanbaly óner sýretshisi. Sondyqtan da, Dárkembaı ustanyń jumystary maǵan jaqyn. Ol úshin qoldanylǵan materıaldardyń kórkem óńdelýi, onyń tabıǵı ádemiliginiń saqtap qalynýy mańyzdy. Sondaı-aq ultymyzdyń kóne dástúrli ónerine degen mahabbaty erekshe baıqalady», - dedi rejısser Mirǵalym Esirkepov.
«Usta» derekti fılmi ótken jyldyń sońyna qaraı óndiriske jiberilgen. Túsirilim jumystary Almaty oblysy Aqshı aýylynda ótken.
Dárkembaı Shoqparuly ómiriniń sońyna deıin osy aýylda turǵan jáne óz sheberhanasyn ashqan. Aqshı aýylynda Dárkembaı Shoqparuly atyndaǵy qolóner mýzeıi ornalasqan. Mýzeıdi 2010 jyly sheberdiń uly ashqan. Sondaı-aq, túsirilimder Dárkembaı Shoqparuly týyp ósken Eńbekshiqazaq aýdanyndaǵy Kazatkom aýylynda ótti.
Keńes zamanynda Dárkembaı Shoqparuly joıylyp bara jatqan halqymyzdyń dástúrli qoldanbaly ónerine jan bitirip, ony saqtap qalýǵa tyrysty. Dıplomdyq jumysy men qolónerdi qatar alyp júrgen ol, aýyl-aýyldardy aralap teri, aǵash, metall óńdeýdiń eski tásilderin jazyp alyp, halyq qolóner shyǵarmashylyǵynyń úlgilerin jınaıdy.
On úsh jasynda ákesinen aıyrylǵan ol, Jetisýdaǵy tanymal qoldanbaly óner ıesi - aǵaıyn aǵasynyń tárbıesinde júrip ónerge erte aralasady. Shoqtyǵy bıik qolóner sheberleriniń qupııa syryn meńgergen Dárkembaı usta artynan urpaqqa mádenı mol mura qaldyryp, qazaqtyń dástúrli ónerin óz shákirtteriniń boıyna sińirdi.
