Almatyda dárigerlerdi ystyq tamaqpen qamtıtyn biregeı joba júzege asyrylýda
Biregeı sharany Bolashaq startap jobasyna qatysýshylar oılastyrǵan.
Joba úılestirýshisi Dıas Tastanbekov ózin ózi qarjylandyratyn jobany maýsym aıynyń basynda qolǵa alǵan. Joba kez-kelgen qazaqstandyq dárigerdiń ystyq tamaq ishýine múmkindik beredi.
Ol úshin ol 2500 teńgege 5 maska, 2 antıseptık, maska fıksatory, 3 qolǵap, dymqyl salfetka satyp alady. Saýdadan túsken qarajat dárigerler men medıtsına qyzmetkerlerine ystyq tamaq jasaýǵa jumsalady.
«Men mamandyǵym hımık. Jobany eki komanda birigip qolǵa alyp jatyrmyz. Men Nazarbaev ýnıversıtetinde kishi ǵylymı qyzmetker bolyp jumys istep júrgende tanysqan dosym Almas, Bolashaq startap jobasynda birge qatysqan Jeńis degen tanysym, Mánshúk áriptesim arnaıy jınaqpen aınalysamyz. Al dosymyz Rahman ystyq tamaq pisirýdi qolǵa alǵan», -dedi Dıas Tastanbekov.
Kraýndfandıng júıesi Qazaqstanǵa endi ǵana enip keledi. Al batysta bul júıe jaqsy damyǵan.
«Negizgi ıdeıasy siz bir úlken ıdeıany qoldaý retinde aqsha beresiz. Alǵys retinde ornyna bir zat alasyz. Bul -qaıyrymdylyq emes. Medıtsına mamandaryn qoldaǵan kezde aqshańyz bosqa ketpeıdi. Bizdiń maqsat - tabys tabý emes. Bul jerde artylatyn az-maz qarajat tek óz shyǵynymyzdy jabady», -dedi D.Tastanbekov.
Qazir bul joba tek Almaty qalasynda júzege asyp jatyr. Joba avtorlary bir kúnde 300 mamandy 2 aı boıy úzdiksiz ystyq tamaqpen qamtymaq.
Kesheli beri bir kúnde 18 jınaq satylǵan. Bul qarajatqa 36 medıtsına qyzmetkerine tamaq áperýge bolady.
Birinshi ol kezekte koronavırýspen kúreste júrgen provızorlyq ortalyqtar men ınfektsııalyq statsıonarlardyń qyzmetkerlerine beriledi.
Bir aıta keterligi, jınaq ishine kiretin zattar Qazaqstanda óndirilgen. Maskanyń durys turýyn qamtamasyz etetin fıksatordy joba avtorlary ózderi 3D baspamen basyp shyǵarady.
