Almatyda dárigerler turǵyndardy tegin qarap, durys tamaqtaný jóninde keńes berýde
ALMATY. 1 qazan. QazAqparat - Búgin Almatydaǵy «Spýtnık» oıyn-saýyq ortalyǵynda Ulttyq salaýatty taǵamtaný ortalyǵy «Salamatty Qazaqstan - 2011-2015» memlekettik baǵdarlamasyn júzege asyrý maqsatynda «Salaýatty tamaqtaný - zamanaýı ómir salty» atty respýblıkalyq aktsııasyn ótkizip jatyr.
Onda «Densaýlyq alańynda» túrli aýrýlar kezindegi tamaqtaný jóninde dáriger-dıetologtardan, azyq-túlik ónimderiniń qaýipsizdigi men sapasy jóninde dáriger-gıgıenıster, osteoporoz dıagnostıkasy boıynsha dáriger-terapevtter tegin keńester men usynystar berýde. Sonymen qosa, mamandardyń semizdiktiń dárejesin anyqtaý boıynsha keńesi berilip, boı uzyndyǵy, salmaq, deneniń ındeks massasy, aǵzadaǵy jalpy jáne ishki maılardyń paıyzdyq mólsheri, qańqa bulshyqet mólsheri jáne negizgi almasýdyń kólemi ólshenip, qan qysymy anyqtalýda. Budan bólek otandyq jáne ulttyq baıytylǵan, sapaly jáne paıdaly ónimderdiń jármeńkesi ótip jatyr.
Dúnıejúzilik densaýlyq saqtaý uıymynyń málimeti boıynsha, ólim-jitimniń 60 paıyzy durys tamaqtanbaýdan oryn alady. Al qorshaǵan ortanyń ekologııalyq zııandy faktorlarynyń 75-80 paıyzy adam aǵzasyna sý jáne azyq-túlikter arqyly túsedi. Jalpy medıko-demografııalyq kórsetkishter, juqpaly jáne juqpaly emes aýrýlardyń taralýy, syrtqy ortanyń qolaısyz faktorlaryna turaqtylyǵy, psıho-emotsıonaldyq júktemeler, óndiristik básekelestik kúshterdiń damý deńgeıi, memlekettiń áleýmettik-ekonomıkalyq deńgeıi jáne onyń ulttyq qaýipsizdigi tikeleı halyqtyń tamaqtaný jaǵdaıymen anyqtalady.
