Almatyda dárigerler menıngokokk juqpasy týraly úı-úıdi aralap túsindirýde
ALMATY. QazAqparat - Almatyda menıngokokk juqpasymen aýrýhanalar kúresip jatsa, emhana qyzmetkerleri aqparattyq jumyspen belsendi aınalysyp jatyr, dep habarlaıdy QazAqparat tilshisi.
Emhana dárigerleri HQKO, bazarlar, meshitter, áskerı bólimder, bilim berý oshaqtarynda túsindirý jumystaryn júrgizip jatyr.
Búginde №11 emhananyń dárigerleri men medıtsınalyq qyzmetkerleri adam kóp shoǵyrlanǵan jerlerdi aralap júr.
«Mamandar negizinen aýrýdyń alǵashqy belgileri, saqtaný joldary týraly túsindirip jatyr. Biz sáýir aıynan beri 8 balabaqshada, 6 mektepte, 2 meshitte, barlyǵy 36 uıymda boldyq. Bul jumystarǵa barlyǵy 28 dáriger jumyldyrylǵan. Odan bólek medbıkeler, psıhologtar, áleýmettik mamandar barady. Arnaıy jadnamalarda barlyq qyzmettiń telefondary, meniń jeke nómirim de ilinip tur», - dedi №11 emhana bas dárigeriniń emdeý isi boıynsha orynbasary Amýrkazınova Aınash.
Sondaı-aq, onyń aıtýynsha, emhananyń 2 dárigeri aptasyna 1 ret juqpaly aýrýhanalar aýrýhanasynda 12 saǵat kezekshilik etedi.
Aıta ketý kerek, Jetisý aýdandyq medıtsınalyq ujymǵa 2 emhana, 3 medıtsınalyq uıym kiredi. Atalǵan ujym boıynsha epıdemıologtar belsendi túsindirý jumystaryn júrgizýde.
«Bizdiń mamandar 4 meshitti, 10 mektepti, 14 balabaqshany, 3 jataqhanany aralady. Sonymen qatar, áleýmettik jelide 367 jazba jarııalandy. Menıngokokk juqpasynan saqtaný týraly profılaktıkalyq vıdeo aýdandaǵy 40 monıtorda kúni boıy kórsetilip turady. Aýlalardy aralap 501 jadnama taratyldy», - dedi epıdemıolog-dáriger Ospanova Raıhan.
Aıta ketý kerek, respýblıka boıynsha qazirgi tańda menıngokokk juqpasyna 59 adamnyń shaldyqqany anyqtaldy.
Elimizde bıyl jyl basynan beri 13 adam qaıtys boldy.
Foto: Rýslana Kanabekova
