Almatyda dárigerler koronavırýs juqtyrǵan 80 jastaǵy qarııany aman alyp qaldy
ALMATY. QazAqparat - Almaty dárigerleri Covid-19 juqtyrǵan 80 jastaǵy aqsaqalǵa kúrdeli ota jasap, ómirine arasha tústi, dep habarlaıdy QazAqparat tilshisi.
Qalalyq qoǵamdyq densaýlyq basqarmasynyń habarlaýynsha, qarııa Ardagerler úıinen qalalyq kardıologııalyq ortalyqtyń jansaqtaý bólimine jetkizildi.
«Kelgende ol kisi basy aınalyp, esinen tanyp, aýa jetpeı, keýdesi aýyryp túsken. Elektrokardıografııaǵa sáıkes dárigerler qalypty jaǵdaıda mınýtyna 60-80 ret soǵýy tıis júrek mınýtyna 27 ret qana soqqanyn jáne qan tolyq júrmeı turǵanyn anyqtady. Naýqas birneshe jyl boıy jasandy kardıostımýlıator, elektrokardıostımýlıatormen ómir súrgen eken. Ýaqyt shekteýli bolǵandyqtan, onyń ústine mıy zardap shekkendikten reanımatsııa bóliminde shuǵyl túrde ýaqytsha endokardıaldy stımýlıatsııa ornatyldy. Sodan keıin júrek soǵysynyń jıiligi qalpyna tústi. Kelesi kúni ınterventsıondy arıtmologtar operatsııa jasap, qurylǵyny aýystyrdy. Eger ýaqytynda medıtsınalyq kómek kórsetilmegende, naýqas qaıtys bolatyn edi. Qabyldanǵan sátte naýqasta eki jaqty pnevmonııa bar ekeni anyqtaldy. Patsıent Covid-19 juqtyrǵan. Bul dıagnoz operatsııa barysyn qıyndatqany ras, biraq bizdiń mamandar jaqsy nátıje kórsetti», - deıdi bas dáriger Almat Qodasbaev.
Tekserý kezinde naýqastyń elektrostımýlıatorynyń qýaty taýsylǵany anyqtalǵan.
Operatsııadan keıin naýqas juqpaly aýrýlar aýrýhanasyna koronavırýs ınfektsııasyn emdeýge jiberildi.
